44–օրյա պատերազմի զոհերի ծնողները բողոքի ակցիա են կազմակերպել կառավարության շենքի մոտ

ԵՐԵՎԱՆ, 4 մայիսի./Նովոստի–Արմենիա/. 44-օրյա պատերազմում զոհված զինծառայողների ծնողները հինգշաբթի բողոքի ակցիա են անցկացնում կառավարության շենքի դիմաց։

Նրանց միացել են ԱԺ նախկին պատգամավորներ Նաիրա Զոհրաբյանն ու Զարուհի Փոստանջյանը, ինչպես նաև «Անկախության շարժման» առաջնորդ, Վայոց Ձորի նախկին մարզպետ Էդգար Ղազարյանը։

Ակցիայի մասնակիցներն իրենց վրդովմունքն են հայտնում խորհրդարանում ՀՀ վարչապետ Նիկոլ Փաշինյանի վերջին ելույթի առնչությամբ, մասնավորապես՝ տարածաշրջանում խաղաղության հասնելու և Թուրքիայի ու Ադրբեջանի հետ հարաբերությունները բարելավելու համար զիջումների գնալու պատրաստակամության կապակցությամբ։

Մասնակիցները բողոքում են ղարաբաղյան հարցում զիջումների և Բաքվի և Անկարայի հետ Հայաստանի հարաբերությունների կարգավորման գործընթացի դեմ։ Նրանց ձեռքում են զոհված զինվորների լուսանկարներ, հայկական քաղաքների ու գյուղերի անուններով պաստառներ, որոնց մի մասը 44-օրյա պատերազմից հետո անցել է Ադրբեջանի վերահսկողության տակ։


Կառավարության շենքի դիմաց ոստիկանական մեծ ուժեր են կենտրոնացած։ Վարչապետը կառսվարության շենքում չէ, նա երկօրյա այցով մեկնել է Չեխիա։–0–