Թուրքիան պարտվել է, իսկ Հայաստանը շարունակում է բարգավաճել. Ալեքսիս Օհանյան

ԵՐԵՎԱՆ, 25 ապրիլի. /Նովոստի-Արմենիա/. Ամերիկահայ գործարար, Reddit կայքի համահիմնադիր Ալեքսիս Օհանյանն ասել է, որ Հայոց ցեղասպանության ճանաչման պայքարը չի դադարելու։ Այդ մասին նա գրառում է կատարել Facebook սոցիալական ցանցի իր էջում։

«Հայոց ցեղասպանությունից 101 տարի անց, մենք դեռևս պայքարում ենք դրա ճանաչման համար: Մենք կանգ չենք առնի: Այսօր (ապրիլի 24) իմ ծննդյան օրն է, և դա կենդանի ապացույցն է նրա, որ Թուրքիան պարտություն է կրել, և մեր ժողովուրդը, շնորհիվ մեր նախահայրերի, շարունակում է բարգավաճել ողջ աշխարհում», - գրել է 33-ամյա գործարարը:

«Շնորհակալություն նրանց, ովքեր տառապեցին մեզնից առաջ»,– ավելացրել է Օհանյանը` նշելով, որ մեկ տարի առաջ իր հոր և պապիկի հետ զրույցների հիման վրա Reddit կայքում հրապարակել է իր պապի կյանքի պատմությունը, ում հաջողվել է փրկվել Ցեղասպանության տարիներին։

«Հղումն իմ էջում է», - ավելացրել է նա:

Ալեքսիսի պապի` Ջոն Օհանյանի ընտանիքը տեղափոխվել է ԱՄՆ Հարփութից (այլ անվանումը` Խարբերդ, այժմ` թուրքական Էլյազիգ):

Forbes ամսագիրն Ալեքսիս Օհանյանին շնորհել է «Ինտերների քաղաքապետ» կոչումը և երկու տարի շարունակ ընդգրկել է նրա անունը իր «30 Under 30» ցուցակում` որպես բարձր տեխնոլոգիաների արդյունաբերության ակնառու ներկայացուցիչ: 2013 թ.-ին Wired ամսագիրը անվանել է նրան «նորարարության առաջատար»:

Reddit–ը լրատվական սոցիալական կայք 2005 թվականին ստեղծել են Սթիվ Հաֆմանը և Ալեքսիս Օհանյանը, կայքում գրանցված օգտատերերը կարող են տեղադրել ինտերնետում իրենց հավանած որևէ տեղեկատվության հղումը։ -0-