Խմորեղենն արտադրվել է տան սենյակներից մեկում․ արտադրամասի գործունեությունը կասեցվել է (ՖՈՏՈ)
ԵՐԵՎԱՆ, 21 նոյեմբերի․/Նովոստի–Արմենիա/․ ՀՀ սննդամթերքի անվտանգության տեսչական մարմնի Արարատի մարզային կենտրոնի տեսուչների կողմից վերահսկողություն է իրականացվել «Ասիական համ» ՍՊԸ-ին պատկանող խմորեղենի արտադրամասում (Արարատի մարզ, գյուղ Զորակ)։
Արդյունքում՝ հայտնաբերվել է, որ տնտեսավարողը խմորեղենն արտադրում է բնակելի տան սենյակներից մեկում, ինչը սննդամթերքի արտադրությանը ներկայացվող նորմերի կոպիտ խախտում է, հայտնում են ՍԱՏՄ-ից։
Բնակելի տան պայմաններում սննդամթերքի աղտոտումը կանխարգելող սարքավորումները և տարածքներն ունենում են մաքրման, ախտահանման և տեխնիկական սպասարկման սահմանափակ հնարավորություններ:
Տեսչական մարմնի ղեկավարի որոշմամբ՝
- «Ասիական համ» ընկերությանը պատկանող արտադրամասի գործունեությունը կասեցվել է,
- ընկերությանը տրամադրվել է ժամանակ՝ բոլոր տեխնիկական և հիգիենիկ պահանջների համապատասխանությունն ապահովելու համար։
