Ոստիկանությունը նվեր է մատուցել կառավարության անդամներին

ԵՐԵՎԱՆ, 20 սեպտեմբերի. /Նովոստի–Արմենիա/. ՀՀ ոստիկանությունը Ֆրանկոֆոնիայի 17–րդ գագաթնաժողովի նախաշեմին կառավարության անդամներին է նվիրել հայերեն–ֆրանսերեն զրուցարան, հինգշաբթի կառավարության նիստից առաջ հայտարարեց ՀՀ վարչապետ Նիկոլ Փաշինյանը։ 

Ֆրանկոֆոնիայի միջազգային կազմակերպության 17–րդ գագաթնաժողովը կանցկացվի Հայաստանում 2018 թ.–ի հոկտեմբերի 11–12–ը։

«Սա շատ լավ առիթ է մեզ համար, որ մեր իմացած լեզուների քանակն ավելացնենք: Ես կարծում եմ, որ նոր Հայաստանում ՀՀ քաղաքացիները պետք է մի քանի օտար լեզու իմանան, ու գագաթնաժողովը լավ առիթ է, որ այս ուղղությամբ մեկ քայլ անենք», – ասաց Փաշինյանը։

ՀՀ ոստիկանապետ Վալերի Օսիպյանն իր հերթին նշեց, որ զրուցարանից ունեն նաև ոստիկանության աշխատակիցները:

«Այն ծառայողներն, ովքեր անմիջապես շփվելու են գագաթնաժողովի հյուրերի հետ, ունեն այդ զրուցարանից», - ասաց ոստիկանապետը:–0–