Ո՞րն է Արթուր Բաղդասարյանի` Մոսկվա մեկնելու պատճառը

ԵՐԵՎԱՆ, 17 փետրվարի. /Նովոստի–Արմենիա/. «Օրինաց երկիր» կուսակցության առաջնորդ Արթուր Բաղդասարյանը երեկ գիշերը մեկնել է Մոսկվա, գրում է «Հրապարակ» թերթը։

Թերթը ՕԵԿ–ի առաջնորդի մամուլի խոսնակ Արթուր Միսակյանից պարզել է, որ Արթուր Բաղդասարյանը մեկնել է Մոսկվա «Ռոսնեֆտի» և ՄՏՍ–ի տնօրենների խորհրդի անդամի աշխատանքային պարտականությունների հետ կապված։

«Հետաքրքիր է, որ այցը եղել է փետրվարի 21–ին` Արթուր Բաղդասարյանի «Հայկական վերածննդի» հիմնադիր համագումարի նախօրյակին։ Գուցե ՕԵԿ նախագահը, Րաֆֆի Հովհաննիսյանի օրինակով, գնացել է Մոսկվայից իր «հաղթանակը» բերելու», նշում են հոդվածի հեղինակները։

Այս թեմային է անդրադարձել նաև «Չորրորդ իշխանություն» թերթը, որը գրում է, որ ավելի քան երեք տարի սփյուռքում գործող «Հայկական վերածնունդ» կազմակերպությունը հայտարարություն է տարածել, որով «Օրինաց երկիր» կուսակցությանն ու Արթուր Բաղդասարյանին մեղադրում է իրենց կազմակերպության անունը կրկնօրինակելու մեջ և դա գնահատում որպես գողություն։

Արթուր Բաղդասարյանը Հայաստանում ստեղծել է «Հայկական վերածնունդ» շարժումը։ –0–