Ո՞ր դեպքում կարելի է պատգամավորին ձերբակալել և ենթարկել քրեական պատասխանատվության

ԵՐԵՎԱՆ, 22 ապրիլի./Նովոստի–Արմենիա/. ՀՀ գլխավոր դատախազությունը հաղորդեց ԱԺ 3 պատգամավորներ Նիկոլ Փաշինյանի, Արարատ Միրզոյանի և Սասուն Միքայելյանի ձերբակալման մասին ՀՀ Սահմանադրության 96-րդ հոդվածի 2-րդ մասի (քրեական հետապնդում պատգամավորի նկատմամբ) պահանջների պահպանմամբ։

«Նովոստի–Արմենիա» գործակալությունը պարզաբանում է` ինչպես և ինչ հիմունքներով կարելի է ձերբակալել և քրեական գործ հարուցել պատգամավորի նկատմամբ, ով ունի անձեռնմխելիություն։

ՀՀ Սահմանադրության համաձայն, պատգամավորն իր լիազորությունների ընթացքում և ժամկետի ավարտից հետո չի կարող ենթարկվել հետապնդման և պատասխանատվության պատգամավորական գործունեության շրջանակում արտահայտած կարծիքի կամ քվեարկության համար։

Նույն հոդվածով նախատեսվում է, որ պատգամավորի նկատմամբ քրեական հետապնդում կարող է հարուցվել միայն ԱԺ–ի համաձայնությամբ։

Սակայն, ըստ Սահմանադրության, պատգամավորը չի կարող զրկվել ազատությունից առանց ԱԺ–ի համաձայնության, բացառությամբ այն դեպքի, երբ նրան բռնել են հանցագործություն կատարելու պահին կամ անմիջապես դրանից հետո։

Այս դեպքում ազատությունից զրկումը չի կարող տևել ավելի քան 72 ժամ։ Պատգամավորին ազատությունից զրկելու մասին անմիջապես իրազեկում են ԱԺ խոսնակին։

Քանի որ ՀՀ ԱԺ խոսնակ Արա Բաբլոյանը, Գլխավոր դատախազության հաղորդմամբ, օրենքով սահմանված կարգով անհապաղ իրազեկվել է ԱԺ պատգամավորների ձերբակալման մասին, ուժի մեջ է մտնում ԱԺ կանոնակարգի դրույթը, մասնավորապես, պատգամավորի նկատմամբ քրեական հետապնդման հարուցման կամ նրան ազատությունից զրկելու մասին համաձայնություն տալու կարգը (108–րդ հոդված)։

ԱԺ կանոնակարգի համաձայն, գլխավոր դատախազը միջնորդություն է ներկայացնում Ազգային ժողովի նախագահին պատգամավորի նկատմամբ քրեական հետապնդման հարուցման կամ նրան ազատազրկելու համաձայնության վերաբերյալ, ով անհապաղ իրազեկում է այդ մասին միջնորդությունում նշված պատգամավորին, իսկ անհնարին լինելու դեպքում` հանդես է գալիս հայտարարությամբ։

Միջնորդությանը կցվում է պատգամավորի նկատմամբ քրեական հետապնդման հարուցման կամ նրան ազատազրկելու համաձայնության վերաբերյալ Ազգային ժողովի որոշման նախագիծը։

Գլխավոր դատախազի միջնորդությունը դիտարկվում է Ազգային ժողովի հերթական նիստում։ Ընդ որում, ելույթի իրավունք ունեն ինքը` Գլխավոր դատախազւ և միջնորդությունում նշված պատգամավորը, որոնց հարցեր են տրվելու, ինչից հետո անցկացվում են դատական կողմերի վիճաբանությունները, և կողմերին եզրափակիչ խոսքի իրավունք է տրվում։

Եթե հարցի դիտարկման սկզբում միջնորդության մեջ նշված պատգամավորը բացակայում է ԱԺ նիստից ոչ հարգելի պատճառով, հարցը դիտարկվում է առանց նրա մասնակցության։

Ազգային ժողովի որոշումը պատգամավորի նկատմամբ քրեական հետապնդման հարուցմանը համաձայնություն տալու կամ նրան ազատազրկելու վերաբերյալ ընդունվում է գաղտնի քվեարկությամբ։ Միաժամանակ Հայաստանի Ազգային ժողովի նախագահն անհապաղ ստորագրում և հրապարակում է խորհրդարանի որոշումը։

Ապրիլի 13–ին «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության ղեկավար Նիկոլ Փաշինյանը Երևանում անցկացնում է շուրջօրյա հանրահավաքներ Սերժ Սարգսյանի վարչապետության դեմ։ Ապրիլի 16–ից հանրահավաքները վերածվեցին քաղաքացիական անհնազանդության համաքաղաքային ակցիաների։ Բողոքներն ուղեկցվում են բախումներով ցուցարարների և իրավապահների միջև, մասնավորապես, Բաղրամյան պողոտայում, փողոցների և առանցքային մայրուղիների, ինչպես նաև պետական հաստատությունների շենքերի արգելափակմամբ։ Ապրիլի 17–ին կազմակերպված հանրահավաքի ժամանակ Փաշինյանը հայտարարեց «թավշյա» հեղափոխության մասին։–0–