Բախվել են «Toyota Camry»-ն ու «Opel»-ը. կա 1 զոհ, 6 վիրավոր
ԵՐԵՎԱՆ, 2 դեկտեմբերի․/Նովոստի–Արմենիա/. Այսօր՝ դեկտեմբերի 2-ին, խոշոր ու ողբերգական ավտովթար է տեղի ունեցել Արմավիրի մարզում, գրում է Shamshyan.com-ը։
Ժամը 15:40-ի սահմաններում Երևան-Արմավիր ավտոճանապարհի 26 կմ հատվածում դեռևս անհայտ հանգամանքներում բախվել են «Toyota Camry» և «Opel» մակնիշի ավտոմեքենաները:
Վթարի հետևանքով 1 հոգի տեղում մահացել է, և ըստ նախնական տեղեկությունների՝ 6 հոգի հոսպիտալացվել են «Վաղարշապատ» բժշկական կենտրոնում:
Վիրավորներին առաջինը օգնության են հասել քաղաքացիները և օպերատիվորեն ժամանած ՀՀ ներքին գործերի նախարարության փրկարար ծառայության Վաղարշապատի հրշեջ-փրկարարական ջոկատի փրկարարները, ովքեր ժամանել են 2 մարտական հաշվարկով:
Դեպքի վայրում հավաքվածները նշում էին, որ օպերատիվ են գործել նաև «Վաղարշապատ» բժշակական կենտրոնի շտապօգնության բժիշկների հերթապահ խմբերը, ովքեր վիրավորներին մինչև հիվանդանոց տեղափոխելը տեղում առաջին բուժօգնությունն են ցուցաբերել:
Վթարի փաստով Վաղարշապատի քննչական բաժնում նախաձեռնվել է քրեական վարույթ, որտեղ էլ պարզվում է վարորդների, մահացածի և վիրավորների ինքնությունը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
