Տղայի վիճակն այս գիշեր վատացել է. թարմ տեղեկություն հնգյակից կենդանի մնացած եռյակի մասին
ԵՐԵՎԱՆ, 13 մայիսի. /Նովոստի–Արմենիա/. Տասը օր առաջ Երևանում ծնված հնգյակից կենդանի մնացած երկու աղջիկների վիճակը շարունակում է մնալ կայուն ծանր, իսկ տղայի վիճակն այս գիշեր ավելի է վատացել, սակայն բժիշկներին հաջողվել է կայունացնել վիճակը, հաղորդում է armtimes.com–ը` մեջբերելով «Մուրացան» բժշկական համալիրի տնօրեն Բագրատ Բավեյի խոսքերը։
«Մեզ մոտ գտնվող տղա երեխայի վիճակը շարունակում է ծայրահեղ ծանր մնալ։ Գիշերը ես եղել եմ հիվանդանոցում, երեխայի վիճակը մի փոքր ավելի վատացավ, հետո հնարավոր եղավ կայունացնել,-ասում է բժիշկը՝ հավելելով, որ անհաս երեխաների պարագայում իրավիճակն անկանխատեսելի է,և բուժման ընթացքը շատ ծանր է։
«Հատկապես, որ մի պտուղ չի, միանգամից հինգ պտուղ է ձևւվորված եղել, ինչը մի քանի անգամ բարդացնում և ծանրացնում է ծնվածների վիճակը», – նշել է բժիշկը։
«Սուրբ Աստվածամայր» ԲԿ-ի վերակենդանացման բաժանմունքի վարիչ Աննա Չոբանյանն էլ նշել է, որ իրենց մոտ գտնվող աղջկա վիճակը կայուն է։
«Տարբեր բաներ ենք փոփոխել իրեն միացված ապարատուրայում, ավելի թեթևացրել ենք, շնչում է ինքնուրույն, 60 գրամ քաշ է ավելացրել, 12 գրամ կեր ենք տալիս,- ասել է բժշկուհին՝ հավելելով, որ այս պահին ապագայի մասին դեռևս վաղ է խոսել։
«Կանխատեսումներ չենք կարող անել, կարող ենք միայն այսօրվա փաստն արձանագրել», – նշել է Չոբանյանը։
Երեխաների հայրը՝ Վարդան Կարապետյանն էլ նշել է, որ տեսել է երեխաներին, ամեն բան նորմալ է։
Մայիսի 3–ի գիշերը «Էրեբունի» ԲԿ–ում ծնվել էր հնգյակ՝ տղա և չորս աղջիկ, որից երկու աղջիկը ծնվելուց օրեր անց մահացել էին:
Ծնվելուց անմիջապես հետո երեխաները տեղափոխվել էին տարբեր բժշկական կենտրոններ՝ վերականգնումն արագ կազմակերպելու նպատակով:
