ԵՐԵՎԱՆ, 29 մայիսի./Նովոստի–Արմենիա/. ԵՊՀ ռեկտոր Արամ Սիմոնյանը երեքշաբթի հայտարարել է քաղաքական հետապնդման և նրա նկատմամբ կիրառվող բռնության փորձի մասին։
Այսօր բողոքի ակցիայի մասնակիցներն արգելափակել էին նիստերի դահլիճի մուտքը, որտեղ անցկացվում էր ակտիվիստների ու համալսարանի ղեկավարության հանդիպումը։ Ցուցարարները մեղադրում էին ԵՊՀ ղեկավարությանը կրթության ցածր մակարդակի, ֆինանսական միջոցների ոչ արդյունավետ բաշխման և օգտագործման մեջ, պահանջում էին ռեկտորի հրաժարականը, պրոֆմիության, ուսանողական և հոգաբարձուների խորհուրդների ցրում։
«ԵՊՀ–ն միշտ եղել է ազատ տարածք, որը բացառել է բռնությունը։ Ես ռեկտոր եղած ողջ ժամանակաշրջանում երբեք բռնություն չեմ գործադրել, բայց այսօր իմ նկատմամբ կիրառվեց բռնություն: Սա ես համարում եմ անթույլատրելի երևույթ: Սա դեմոկրատիա չէ, սա հաշվեհարդար է, այդ թվում` քաղաքական գաղափարների և քաղաքական կուսակցության պատկանելու համար։ Եվ ես կարող եմ հայտարարել, որ ինձ հետապնդում են քաղաքական հայացքների համար», – ասաց Սիմոնյանը։
Նրա խոսքով, բողոքի ակցիայի մասնակիցներն այսօր հանդիպման ժամանակ չեն ձևակերպել ոչ մի հստակ և հիմնարար պահանջ։
«Ես որևէ զիջման չեմ գնա բռնության կիրառման դեպքում։ Ես կարող եմ զիջումների գնալ միայն կամավոր», – ասաց Սիմոնյանը։
Նա ընդգծեց, որ դեմ չէ աուդիտի կամ գնումների համար տրամադրված պետական միջոցների օգտագործման ստուգումներ անցկացումից, ցանկացած քննարկումներից կենսական խնդիրների օպտիմալ լուծման համար, սակայն ոչ նման մեթոդներով։
«Աուդիտ անցկացվել է նախորդ տարվա վերջում։ Այս տարի սպասվում է նոր, բաց աուդիտի անցկացում։ Ես իմ աշխատանքը կատարյալ չեմ համարում, սակայն հարկավոր է ամեն ինչ օբյեկտիվ գնահատել», – ասաց Սիմոնյանը։
Նրա խոսքով, նա պատրաստ է հրաժարական տալ, եթե դա պահանջեն նախագահը կամ վարչապետը։
«Սակայն ավելի ճիշտ է Հոգաբարձուների խորհրդի որոշումը։ Ես այս խնդրի իրավական որոշման կողմնակիցն եմ։ Եթե կիրառվի բռնություն, ապա դա կդառնա նախադեպ և կհանգեցնի անկանխատեսելի հետևանքների», – հայտարարեց Սիմոնյանը։–0–
