Ռուս սահմանապահները Իրանից Հայաստան թմրանյութերի ներկրման փորձ են կանխել

ԵՐԵՎԱՆ, 23 մարտի. /Նովոստի–Արմենիա/. ՀՀ–ում ՌԴ ԱԴԾ Սահմանային վարչության Մեղրիի սահմանային ջոկատի զինծառայողները «Մեղրի» մաքսակետի աշխատակիցների հետ համատեղ ձերբակալել են Իրանի քաղաքացու, ով փորձել է հայ–իրանական սահմանով թմրանյութ անցկացնել, տեղեկացնում է Սահմանային վարչության մամուլի ծառայությունը։

«Մարտի 22–ի լույս 23–ի գիշերը Սյունիքի մարզի «Ագարակ» հսկիչ–անցակետում Թեհրան–Երևան երթուղին իրականացնող միջազգային ավտոբուսի ուղևորների սահմանային ստուգման ընթացքում նկատվել է, որ Իրանի քաղաքացին չափազանց անհանգիստ է», – նշվում է հաղորդագրության մեջ։

Այս մասին իրազեկվել են մաքսակետի աշխատակիցները, ովքեր իրականացրել են անձնական խուզարկություն և Իրանի քաղաքացու բաճկոնի աստառում հայտնաբերել պալիէթիլենային փաթեթ, որի մեջ եղել է ավելի քան 10 գրամ քաշով բուսական ծագման նյութ։ Ենթադրվում է, որ դա օփիում է։

2016 թ.–ին ՀՀ–ում ՌԴ ԱԴԾ Սահմանային վարչության աշխատակիցները, ովքեր հսկում են հայ–իրանական սահմանի հատվածը, ՀՀ մաքսային ծառայության աշխատակիցների հետ համատեղ բացահայտել և կանխել են ավելի քան 5,5 կգ քաշով թմրանյութերի ներկրման փորձ։ –0–