Պարզվել են Գյումրիում ավտոմեքենայի մեջ մահացած կնոջ և տղամարդու ինքնությունն ու մահվան պատճառը

ԵՐԵՎԱՆ, 9 փետրվարի. /Նովոստի–Արմենիա/. Պարզվել է Գյումրիի ռեստորաններից մեկի ավտոտնակում` ավտոմեքենայի մեջ մահացած երիտասարդ կնոջ և տղամարդու ինքնությունը։

Ինչպես հաղորդել էինք ավելի վաղ, այսօր առավոտյան Մարմաշենի խճուղու ռեստորանային համալիրներից մեկի ավտոտնակում` ավտոմեքենայի մեջ, հայտնաբերվել է 1987 թ.–ին ծնված տղամարդու և 1990 թ.–ին ծնված կնոջ դիեր։

Shamshyan.com–ի հաղորդմամբ, ոստիկաններն ու քննիչները ավտոտնակում հայտնաբերել են Volkswagen Vento մակնիշի ավտոմեքենա, որի հետևի նստատեղին հայտնաբերել են Գյումրի քաղաքի Շերբինայի փողոցի բնակիչ 31-ամյա Դավիթ Մ.-ի և Գյումրի քաղաքի Մ. Ավետիսյան փողոցի բնակիչ28-ամյա Քրիստինե Շ.-ի դիերը:

Դատաբժշկի նախնական եզրակացությամբ` դիակների վրա բռնության հետքեր չկան:

Փաստի առթիվ նյութեր են նախապատրաստվում։

Հիշեցնենք, որ սա երկրորդ նման դեպքն է մեկ օրվա ընթացքում։ Այսօր ժամը 00:30-ի սահմաններում Երևան քաղաքի Իսակովի պողոտայի շենքերից մեկի հարակից տարածքում գտնվող ավտոտնակում կայանված «Օպել Աստրա» մակնիշի ավտոմեքենայի առջևի ձախ և աջ նստատեղերին հայտնաբերվել են Երևանի երկու բնակիչների՝ 1977թ. ծնված կնոջ և 1979թ. ծնված տղամարդու մարմինները:–0–