ԵՐԵՎԱՆ, 14 հունվարի. /Նովոստի–Արմենիա/. Հայաստանի ազգային անվտանգության ծառայությունը քաղաքական գործչի և ձեռներեցի է ձերբակալել Նորք–Մարաշի զինված հանցախմբի գործով։
Ինչպես հաղորդում է ԱԱԾ մամուլի ծառայությունը, ՀՀ ազգային անվտանգության ծառայության քննչական վարչության վարույթում քննվող քրեական գործով, ՀՀ քրեական դատավարության օրենսգրքի 129-րդ հոդվածով սահմանված կարգով, հունվարի 14–ին ձերբակալվել են «Հայրենիք և պատիվ» կուսակցության նախագահ Գառնիկ Մարգարյանը և «Եղվարդի մարզակոշիկների ֆաբրիկա» ԲԲԸ–ի հիմնական բաժնետեր Վլադիմիր Առաքելյանը։
Նորք-Մարաշում վնասազերծված խմբի որոշ անդամներ դեռ ազատության մեջ են>>
«Նրանք կասկածվում են՝ Արթուր Վարդանյանի կողմից ստեղծված հանցավոր համագործակցությանը մասնակցելու, կազմակերպված խմբի կազմում զենք և ռազմամթերք իրացնելու, պահելու մեջ», – նշվում է ԱԱԾ–ի տարածած հաղորդագրության մեջ։
Մարգարյանի և Առաքելյանի բնակարաններում և «Եղվարդի մարզակոշիկների ֆաբրիկա» ԲԲԸ–ում իրականացվել են խուզարկություններ, ձեռնարկվում են բոլոր անհրաժեշտ միջոցառումները գործի լրիվությունը, բազմակողմանիությունը և օբյեկտիվությունն ապահովելու համար: Նախաքննությունը շարունակվում է:
Երևանում վնասազերծված հանցախմբի թիրախը կարող էին լինել խորհրդարանն ու վարչապետը>>
ՀՀ ազգային անվտանգության ծառայությունը նախորդ տարվա նոյեմբերի 25–ին տեղեկացրել էր 19 հոգուց բաղկացած զինված հանցախմբի վնասազերծման մասին, որի նպատակն էր կազմակերպել մի շարք ծանր հանցագործություններ հանրապետության տարածքում։
Հանցախմբի անդամների կողմից վարձակալած տան խուզարկության ընթացքում հայտնաբերվել էին տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր և պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք, այդ թվում` զրահաբաճկոններ: –0–
