ԵՐԵՎԱՆ, 5 նոյեմբերի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա` հոկտեմբերի 31–ից նոյեմբերի 4–ն ընկած ժամանակահատվածի կարևոր նորությունների հնգյակը։
Նախորդ շաբաթ ՀՀ վարչապետը հանձնարարեց խստորեն պատժել տպարանի շենքի պայթեցման հարցում բացթողումներ թույլ տված պատասխանատուներին։ Հաջորդ օրը ՀՀ ԱԻՆ–ում հրավիրված խորհրդակցության ժամանակ հայտնի դարձավ, որ ՀՀ ԱԻՆ պետական հրդեհային և տեխնիկական անվտանգության տեսչությունը և լիցենզավորման հանձնաժողովը, ԱԻ նախարարի հանձնարարությամբ ուսումնասիրելով Երևանի Հանրապետության 65 շենքի Բ մասնաճյուղում (նախկին առաջին տպարան) իրականացված պայթեցման աշխատանքների արդյունքներն ու հետևանքները, օրենքով սահմանված կարգով 2 ամիս ժամկետով կկասեցնի և 1 մլն դրամի չափով տուգանքի կենթարկի պայթեցման աշխատանքներ իրականացրած «ՆՈՐՏԵԽ ՇԻՆ» սահմանափակ պատասխանատվությամբ ընկերությանը:
Նոյեմբերի 1–ին հանրապետության գրեթե ողջ տարածքում, այդ թվում` Երևանում, գրանցվեցին տեղումներ ձյան տեսքով։ «Հիդրոմետ» ծառայության օդերևութաբանական կենտրոնի պետի տեղակալ Գագիկ Սուրենյանի խոսքով, նոյեմբերի 1–ին Երևանում թափվել է ամբողջ նոյեմբեր ամսվա ամսական տեղումների կրկնապատիկի չափ տեղում։
Նախագահականում տեղի ունեցած խորհրդակցության ընթացքում ՀՀ նախագահ Սերժ Սարգսյանը հանձնարարեց 10-օրյա ժամկետում մշակել համապատասխան իրավական մեխանիզմներ, որպեսզի ճանապարհային երթևեկության կանոնների վերահսկման համակարգի ոլորտում առկա ֆինանսական հոսքերի տնօրինումն ու կառավարումը անցնեն պետական և համայնքային կառույցներին: Միաժամանակ, ՀՀ վարչապետ Կարեն Կարապետյանը հինգշաբթի կառավարության նիստի ժամանակ մի շարք հանձնարարականներ տվեց` կապված երկրում գործող մասնավոր ավտոկայանատեղիների և ճանապարհային ռադարների հետ։
Հայաստանի ֆուտբոլի հավաքականի և «Մանչեսթեր Յունայթեդի» կիսապաշտպան Հենրիխ ՄԽիթարյանը դուրս եկավ խաղադաշտ «Ֆեներբախչե»–«Մանչեսթեր Յունայթեդ» խաղում։ Հանդիպման երկրորդ խաղակեսում «Մանչեսթեր Յունայթեդը» պարտվում է 0։2 հաշվով, և «կարմիր սատանաների» գլխավոր մարզիչ Ժոզե Մաուրինյոն վերջապես որոշեց դաշտ հանել Հենրիխ Մխիթարյանին, ով շուրջ 2 ամիս դուրս չէր գալիս խաղադաշտ։
ՀՀ ֆուտբոլի ֆեդերացիայի նախագահ Ռուբեն Հայրապետյանը մեկնաբանել է Սպորտի և երիտասարդության հարցերի նախարար Հրաչյա Ռոստոմյանի հայտարարությունը հավաքականի ձախողված ելույթների պատճառներն ուսումնասիրելու մասին։ Նա մասնավորապես խորհուրդ է տվել Ռոստոմյանին զբաղվել իր առաջին մասնագիտությամբ` ատամնաբույժի գործով։ Դրան ի պատասխան` սպորտի նախարար Հրաչյա Ռոստոմյանը նշել է, որ չի կարծում, որ Ռուբեն Հայրապետյանն իրեն խորհուրդ տվողների ցանկում է։–0–
Զինվորական կացարանում զոհված 15 զինծառայողների ծնողները հանդիպել են Փրկարար ծառայության տնօրեն-ներքին գործերի նախարարի տեղակալ, գնդապետ Կամո Ցուցուլյանին
