Մեր պետական լեզուն հայերենն է, իսկ մնացած բոլորն օտար լեզուներ են, այդ թվում` ռուսերենը. Լևոն Մկրտչյան

ԵՐԵՎԱՆ, 22 սեպտեմբերի. /Նովոստի–Արմենիա/. Հայերենը եղել և մնում է միակ պետական լեզուն Հայաստանում, ուրբաթ ասուլիսի ժամանակ հայտարարեց ՀՀ ԿԳ նախարար Լևոն Մկրտչյանը։

Ավելի վաղ հաղորդվել էր, որ ՀՀ ԿԳ նախարարությունը մշակել է Հայաստանի Հանրապետության հանրակրթական ծրագրեր իրականացնող ուսումնական հաստատություններում ռուսաց լեզվի դասավանդման հայեցակարգ` ռուսաց լեզվի դասավանդման բարձր որակ ապահովելու նպատակով։ Ինչպես նշվում է փաստաթղթում, Հայաստանում ռուսաց լեզվի դասավանդման հետ կապված խնդիրները կրում են ինչպես բովանդակային, մեթոդական, այնպես էլ կադրային բնույթ։ «Այս խնդիրները լուծելու համար առաջարկվում է վերանայել և մանրամասնել «Ռուսաց լեզու» առարկայի բովանդակային պահանջները միջնակարգ ընդհանուր հանրակրթության պետական կրթական չափորոշիչներում, ինչպես նաև կազմակերպել ռուսաց լեզվի ուսուցում այս կամ այն առարկայական ոլորտում (ֆիզիկա, մաթեմատիկա, աշխարագրություն և այլն), այսինքն՝ ավագ դպրոցում մի շարք առարկաններից որոշ թեմաների՝ հայերենին զուգահեռ դասավանդում:Առաջարկվում է նաև Ռուսաց լեզվի խորացված ուսուցմամբ դպրոցների և դասարանների (ինչպես նաև ռուսերենով ուսուցմամբ դասարանների) թվի ավելացման նպատակահարմարության որոշման համար մշտադիտարկման անցկացում», – նշվում է հայեցակարգում։


Այս փաստն առաջացրել էր բուռն քննարկումներ հայկական հասարակության շրջանում, մասնավորապես, խոսակցություններ են գնում ռուսերենին պետական լեզվի կարգավիճակ տրամադրելու հնարավորության մասին։

«Մենք անկախ պետություն ենք, և մնացած բոլոր լեզուները մեզ համար օտար են», – ընդգծեց Մկրտչյանը։

Նա կոչ արեց չքաղաքականացնել ռուսաց լեզվի հայեցակարգի թեման, որը մշակվել է հանրակթրական դպրոցներում լեզվի դասավանդումը խորացնելու նպատակով։

Մկրտչյանի խոսքով, հայեցակարգը մշակվել է ոչ միայն ռուսերենի, այլ նաև մյուս օտար լեզուներով հարցով։

«Դպրոցներում ուսուցումն իրականացվում է հայերեն։ Սակայն մենք պետք է բարձրացնենք նաև օտար լեզուների դասավանդման որակը», – ասաց նախարարը։–0–