Մեծ կաշառք. ընտրություններին իշխանությունը պատրաստվում է ծախսել շուրջ 100մլն դոլար. թերթ
ԵՐԵՎԱՆ, 10 մարտի. /Նովոստի–Արմենիա/. Քաղաքական կուլիսներում տարբեր տեսակետներ են շրջանառվում, թե այս խորհրդարանական ընտրություններին իշխանությունը ծախսելու է ավելի քան 100 մլն դոլար, գրում է «Հայկական ժամանակը»։
Այդ գումարի գերակշիռ մասը բնականաբար ստվերային շրջանառություն է լինելու:
Ինչպես նշվում է թերթի հոդվածում, խոսքն ինչպես խոստացվող 10-50 հազար դրամ կաշառքի, այդպես էլ ռեյտինգային ընտրակարգով առաջադրված թեկնածուների, գովազդային հոլովակների, հեռուստաեթերի, պաստառների, բուկլետների ծախսերի մասին է: Հատկապես ռեյտինգային ընտրակարգով առաջադրված հիմնական թեկնածուները պատրաստվում են աստղաբաշխական գումարներ ծախսել:
«Եվ ինչպես նախորդ ընտրություններին Հեղինե Բիշարյանն էր ասում Սամվել Ալեքսանյանի մասին, երկրի հարուստ օլիգարխները բացել են իրենց փողի տոպրակները: ՀՀԿ կազմակերպչական հանձնաժողովի ղեկավար Ռուբեն Թադևոսյանը չհամաձայնեց այս տեղեկության հետ՝ հայտարարելով, թե դա բանահյուսության ժանրից է», – նշում են հոդվածի հեղինակները։
«Ամեն ինչ են խոսում, հանիրավի, երբեմն սուտ, բայց միտումնավոր տարբեր բաներ են խոսում: Բայց եթե կան փաստեր, ուղարկեք իրավապահ մարմիններին», – նշել է նա։–0–
