Կոռուպցիան չի վերանում, եթե միջավայրը չի փոխվում. ՀՀ վարչապետ

ԵՐԵՎԱՆ, 23 հոկտեմբերի. /Նովոստի–Արմենիա/. ՀՀ կառավարությունը կփորձի նվազագույնի հասցնել հնարավոր կոռուպցիոն ռիսկերը, շաբաթ օրը հայտարարել է ՀՀ վարչապետ Կարեն Կարապետյանը տեղական մի շարք հեռուստաընկերություններին տված հարցազրույցում։

«»Ես համոզված եմ, որ կոռուպցիայի դեմ պայքարի մեջ խիստ անհրաժեշտ է մաքսիմալ վերացնել այն միջավայրը, որը ստեղծում է այդ հնարավորությունը, որովհետև կոռուպցիայի դեմ պայքարելով, N-եորդ կոռուպցիայի դեմ կառույց ստեղծելով, կոռուպցիան չի վերանում, եթե միջավայրը չի փոխվում», – ասել է Կարապետյանը։

Նա նշել է, որ կառավարության ծրագրում մանրամասն գրված է, թե ինչ գործողություններ ենք անելու, որպեսզի այդ հնարավորությունը մինիմումի բերենք թե՛ հարկային և մաքսային դաշտում, թե՛ կառավարության որոշումների դաշտում, թե՛ գնումների դաշտում, թե՛ օտարերկրյա ֆինանսավորման դաշտում, թե՛ բիզնեսի համար հավասար և պարզ պայմաններ ստեղծելու դաշտում:

Նրա խոսքով` Կոռուպցիայի դեմ պայքարի հանձնաժողովն այս պահին անհրաժեշտ կառույց է։

Վարչապետն ընդգծել է, որ այն կառույցները և այն միջավայրը, որոնք որ կան, իդեալական չեն, այդ իսկ պատճառով մի կառույց է ստեղծվում, որը փորձում է համախմբել, ամփոփել, ախտորոշել և որոշակի որոշումներ տալ:

«Մենք հիմա փորձում ենք այնտեղ ներգրավել հասարակության ներկայացուցիչներին, որպեսզի և դաշտը բաց լինի, և կառավարության անդամները, ճիշտ ասած, իրենց առօրյայի մեջ այնքան զբաղված են կամ այնքան զբաղված պետք է լինեն, որ գուցե և արտաքին դաշտից ազդակներ չստանան», – եզրափակել է Կարապետյանը։–0–