ԵՐԵՎԱՆ, 3 հունիսի./Նովոստի–Արմենիա/. Խոշոր սուպերմարկետների ցանցերի ներկայացուցիչները հայտարարություն են տարածել` նշելով, որ նվազեցնում են գներն ու պատրաստ են աշխատել գործող օրենքների խստագույն պահպանմամբ։
Հունիսի 1–ին սուպերմարկետների ցանցերի ներկայացուցիչները նամակով դիմել էին ՀՀ վարչապետին ու արտահայտել իրենց մտահոգությունը հնարավոր ռիսկերի կապակցությամբ, որոնք կապված են առևտրի կետերի հետագա գործունեության հետ ԱԱԾ–ի վերջին բացահայտումների ֆոնին։ Սուպերմարկետների ցանցերի ներկայացուցիչների նամակում, մասնավորապես, նշվում է, որ հեղինակները ողջունում են կառավարության քաղաքականությունն` ուղղված առևտրով զբաղվող սուբյեկտներին օրինական դաշտ բերելուն։ Միաժամանակ նրանք նշում են, որ սուպերմարկետների ցանցերի գործունեությունը, ինչպես նաև գյուղմթերքի գները հայտնվել են սպառնալիքի տակ մի շարք սկզբունքային պատճառների պատճառով։
Загружается новость ... "Лево"
Ավելի վաղ ԱԱԾ–ն հանդես էր եկել
հայտարարությամբ` նշելով, որ «Ալեքս Հոլդինգ» ՍՊԸ–ն դեռևս 2016 թվականի վերջին, տեղական գյուղմթերքի գնաճ չառաջացնելու պատրվակով, համաձայնություն է ձեռք բերել ՀՀ ՊԵԿ նախկին ղեկավարության հետ` գյուղացիներից գնված գյուղմթերքի վաճառքը «Երևան Սիթի» սուպերմարկետների ցանցից իրականացնել տարբեր անձանց անվամբ հիմնադրված ԱՁ-ներով, որոնց իրացման շրջանառության սահմանաչափը 115 մլն ՀՀ դրամ է, ինչը հնարավորություն է ընձեռել 20 տոկոս ԱԱՀ-ի և շահութահարկի փոխարեն վճարել ընդամենը 2 տոկոսի չափով շրջանառության հարկ: Այնուհետև, «Ալեքս Հոլդինգ» ՍՊ ընկերության ղեկավար կազմը, մինչև 2018 թ. մայիս ամիսը ներառյալ, ինչպես իրենց ընկերության աշխատակիցների, այնպես էլ վերջիններիս ընտանիքների անդամների և ծանոթների անվամբ, հիմնականում նույն նոտարի մոտ, գրանցել են 461 ԱՁ-ներ, որոնք գործունեություն են ծավալել «Երևան Սիթի» սուպերմարկետների ցանցում:
«Մեր ընկերությունները ՀՀ ՊԵԿ նախկին ղեկավարության հետ ունեցած պայմանավորվածության համաձայն տեղական արտադրության գյուղմթեքի և մսամթերքի վաճառքն իրականացրել են գրանցված տարբեր ԱՁ-ներով` այդ կերպ նպատակ ունենալով ապահովել մանրածախ վաճառքի ցածր գները։ Ստեղծված իրավիճակում, հասկանալով տվյալ ոլորտը կարգավորելու անհրաժեշտությունը, հայտարարում ենք, որ վերջին օրերին մեր կողմից բարձրացված գները վերդարձնում ենք նախկին մակարդակի, և դրանք անփոփոխ են: Պատրաստակամ ենք գործող օրենքների խստագույն պահպանմամբ շարունակել մեր հետագա գործունեությունը» ,– նշված է հայտարարության մեջ։
Հայտարարությունը, մասնավորապես, ստորագրել են «Երևանի Սիթի», «Նոր Զովք», «Կրպակ» «Կայզեր», «Սաս Գրուպ», «Պարմա», «Ծիրան», «Էվրիկա», «Վաս գրուպ», «Դանիելյան», «Շիրակ» սուպերմարկետների ցանցերի ներկայացուցիչները։–0–
