ԵՐԵՎԱՆ, 23 մայիսի./Նովոստի–Արմենիա/. ՀՀ աշխատանքի և սոցիալական հարցերի նախարար Մանե Թանդիլյանը նախագիծ էներկայացրել կառավարության քննարկմանը կուտակային կենսաթոշակների պարտադիր բաղադրիչի առաջիկա գործարկումը մեկ տարով հետաձգելու համար։
Այս մասին Թանդիլյանը հայտնել է Facebook–յան իր էջում։
«Նախագիծ եմ ներկայացրել կառավարության քննարկմանը կուտակային կենսաթոշակների պարտադիր բաղադրիչի առաջիկա գործարկումը մեկ տարով հետաձգելու համար։ Կուտակայինի մասով այս պահին սա առաջնահերթ խնդրի լուծումն է», – նշել է Թանդիլյանը։
Նրա խոսքով, կամավորության սկզբունքով համակարգին միանալը լավագույն լուծումն է, որովհետև այդ դեպքում է կուտակային համակարգն առհասարակ արդյունավետ աշխատում։
«Սա սկզբունքային մոտեցում է, և այդ առումով համակարգը պետք է լինի այնքան գրավիչ, որ մեր քաղաքացիներն իսկապես ցանկություն ունենան` անկախ հետագայից։ Իմ կարծիքով` սա է համակարգի հաջողության գրավականը», – նշել է Թանդիլյանը։
Կենսաթոշակային պարտադիր կուտակային համակարգը ներդրվել է Հայաստանում 2014 թ.–ի հունվարի 1–ից և գործում է 1974 թ.–ի հունվարի 1–ից հետո ծնված բոլոր քաղաքացիների համար։
«Կուտակային կենսաթոշակների մասին» օրենքի մի շարք դրույթները ՀՀ սահմանադրությանն անհամապատասխան ճանաչելուց հետո պարտադիր բաղադրիչը գործում է միայն բյուջետային աշխատողների համար։ Մնացած քաղաքացիների համար օրենսդրական կարգով նախատեսվում էր ավելի վաղ կատարված կենսաթոշակային վճարների վերադարձ։
ՀՀ ԱԺ–ն այս տարվա մայիսի 12–ին երկրորդ և վերջնական ընթերցմամբ ընդունեց փոփոխություններ «Կուտակային կենսաթոշակների մասին» օրենքում, որոնք նախատեսում են պարտադիր բաղադրիչի ներդրման ժամկետի երկարաձգում մինչև 2018 թ.–ի հուլիսի 1–ը։–0–