Ջայլամի մսից հայկական բաստուրմա, սուջուխ. այո–այո, սա իրականություն է (ՖՈՏՈ)
ԵՐԵՎԱՆ, 3 մարտի. /Նովոստի–Արմենիա/. ՀՀ Արմավիրի մարզի Փշատավան համայնքում ջայլամաբուծությամբ զբաղվող ֆերմերային տնտեսություն է գործում, որը հիմնադրվել է 2008 թ.–ին։
ՀՀ գյուղատնտեսության նախարար Իգնատի Առաքելյանը, պաշտոնատար այլ անձանց ուղեկցությամբ, Արմավիրի մարզ կատարած այցի շրջանակում այցելել է նաև ջայլամաբուծությամբ զբաղվող ֆերման։
Նշենք, որ ջայլամները Հայաստան են ներմուծվել հարևան Իրանից, ներկայում այստեղ բուծվում է 400 ջայլամ, որոնք արդեն հարմարվել են տեղի կլիմային:
Նախորդ տարվա վերջին մսամթերքի արտադրություն են սկսել. ջայլամի մսից արտադրում են բաստուրմա, սուջուխ, տհալ և մատակարարում տեղական սուպերմարկետներին, հայտնում են ՀՀ գյուղատնտեսության նախարարության մամուլի ծառայությունից։
Ֆերմայի գլխավոր անասնաբույժ Արմեն Սարգսյանի խոսքով` նախատեսում են ընդլայնել գործունեությունը։
Կարտադրեն ջերկի , ինչպես նաև կզբաղվեն կաշվի և փետուրների վերամշակմամբ:
Հնարավոր է, որ շուտով հայկական ջայլամի մսամթերքը համտեսելու հնարավորություն ունենան նաև Ռուսաստանի սպառողները:–0–
