«Ինֆորմացիա կա, որ դեղատոմսը դեղատների դիմաց գրում, տալիս են, և դրա համար լրացուցիչ վճար կա».վարչապետը`առողջապահության փոխնախարարին
ԵՐԵՎԱՆ, 6 մարտի. /Նովոստի–Արմենիա/. ՀՀ վարչապետ Կարեն Կարապետյանը երեքշաբթի կառավարության նիստի ժամանակ հանձնարարեց Առողջապահության նախարարությանն ուժեղացնել վերահսկողությունը դեղատոմսերի անօրինական տրամադրման նկատմամբ։
«Ինֆորմացիա կա, որ արդեն դեղատոմսերը դեղատների դիմաց գրում, տալիս են, և դրա համար լրացուցիչ վճար կա։ Շա՛տ ուշադիր եղեք, որպեսզի բուտաֆորիա չդառնա», – նշեց վարչապետը`դիմելով ՀՀ առողջապահության փոխնախարար Սամվել Մարգարյանին։
Նիստի ժամանակ հավանության է արժանացել «Դեղատոմսերի ձևի, դեղատոմսերի դուրսգրման կարգի, դեղերի բացթողնման մասին, ինչպես նաև դեղորայքի և դեղամիջոցների հաշվառման կարգի մասին» որոշման մեջ փոփոխություններ կատարելու մասին նախագիծը։
Ինչպես նիստի ընթացքում նշեց ՀՀ առողջապահության փոխնախարար Սամվել Մարգարյանը, փոփոխությունները նախատեսում են որոշումն ուժի մեջ մտնելու աստիճանական ժամանակացույց, որի հիմքում դրված է դեղերի ռիսկերի աստիճանը։ Առավել ռիսկային հոգեմետ դեղերն ու հակաբիոտիկները բաց կթողնվեն դեղատոմսով մարտի 1–ից։ Հաջորդ փուլում պարտադիր պահանջը կտարածվի նաև ներարկումային դեղերի վրա, իսկ արդեն հոկտեմբերի 1–ից այդ պահանջները կտարածվեն դեղորայքի բոլոր ցուցակների վրա, որոնք նախատեսում են դեղատոմս վաճառք։–0–
