ԵՐԵՎԱՆ, 23 մարտի. /Նովոստի–Արմենիա/. ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը խոսել է հանրապետության տարածքում ապրիլին սպասվող եղանակի մասին։
«Ապրիլին օդի ջերմաստիճանը կանխատեսվում է նորմայի սահմաններում, իսկ տեղումների քանակը` նորմայից բարձր, ինչը շատ լավ է, քանի որ տաք ձմռան հետևանքով մենք այս տարի ջրային ռեսուրսների հետ կապված խնդիր ունենք», – ասաց Սուրենյանն ուրբաթ ասուլիսի ժամանակ։
Загружается новость ... "Лево"
Նա ավելացրեց, որ Հայաստանում ապրիլը կլիմայական ցուցանիշներով նման կլինի մարտին։
«Այս տարի մարտին մեզ մոտ գրանցվեց գրեթե այնպիսի եղանակ, որը սովորաբար գրանցվում է ապրիլին։ Հովտային շրջաններում օդի ջերմաստիճանը ցերեկային ժամերին կլինի նորմայի սահմաններում` +22...+24, իսկ գիշերը` +8...+10», – նշեց Սուրենյանը։
Նրա խոսքով, լեռնային շրջաններում` Շիրակում, Գեղարքունիքում, Կոտայքում, Արագածոտնում և Վայոց Ձորում, օդի ջերմաստիճանը գիշերային ժամերին կտատանվի +3...+8 աստիճանի սահմանում, ցերեկային ժամերին` +15...+20–ի։
«Լոռիում և Տավուշում օդի ջերմաստիճանը ցերեկը կտատանվի +20...+24–ի սահմանում, գիշերը` +8...+10–ի սահմանում։ Ամենատաք եղանակը կգրանցվի Սյունիքում, որտեղ օդի ջերմաստիճանը ցերեկը կբարձրանա` հասնելով +27–ի, գիշերը կանխատեսվում է մինչև 15 աստիճան տաքություն։ Նույնը կանխատեսվում է մայրաքաղաքում։ Ամսվա ընթացքում օդի ջերմաստիճանը ցերեկը կտատանվի +22...+24–ի սահմանում, գիշերը` +10...+12–ի սահմանում», – ավելացրեց Սուրենյանը։
Միաժամանակ օդերևութաբանը վստահեցրեց, որ հանրապետության տարածքում գարնանային ցրտահարությունների հավանականությունը բավականին փոքր է։–0–
