Հիվանդանոցում մահացել է ՊՊԾ գնդի վրա գրոհի ժամանակ վիրավորված ոստիկանը

ԵՐԵՎԱՆ, 13 օգոստոսի. /Նովոստի–Արմենիա/. Այսօր հիվանդանոցում մահացել է հուլիսի 17-ին զինված խմբի կողմից ՊՊԾ գնդի վրա գրոհի ժամանակ հրազենային ծանր վնասվածքներ ստացած՝ ՊՊԾ գնդի հերթապահ ծառայության հերթապահի օգնական, ոստիկանության ավագ ենթասպա Գագիկ Մկրտչյանը։

Այս մասին Facebook սոցցանցի իր էջում հաղորդել է ՀՀ ոստիկանության տեղեկատվության և հասարակայնության հետ կապերի վարչության պետ Աշոտ Ահարոնյանը։

«Վնասվածքները որովայնի, կրծքավանդակի, ստորին վերջույթների շրջանում էին, բժիշկները չորս անգամ վիրահատել էին նրան, ամեն րոպեն պայքար էր նրա կյանքի համար, սակայն փրկել, ավաղ, չկարողացան», – նշել է Ահարոնյանը։

Գագիկ Մկրտչյանը ոստիկանության համակարգ էր ընդունվել 1993 թ.–ի նոյեմբերին։ Նա ունի վեցամյա որդի։–0–