Նախորդ շաբաթվա կարևոր նորությունների հնգյակը

ԵՐԵՎԱՆ, 10 փետրվարի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը։

• ՖԻՖԱ-ի աշխարհի առաջնության գավաթը եկավ Հայաստան` Երևան։ Արարողակարգի համաձայն, ըստ որի, գավաթի միջազգային շրջագայության ժամանակ հյուրընկալող երկրում այն ընդունում են երկրների ղեկավարները և ՖԻՖԱ-ի աշխարհի առաջնության չեմպիոնները, ՀՀ նախագահ Սերժ Սարգսյանը ոսկե գավաթը ընդունեց 1998 թվականի ՖԻՖԱ-ի աշխարհի առաջնության չեմպիոն Ֆրանսիայի ազգային հավաքականի կազմում հանդես եկած Քրիստիան Կարամբյոյից:

• Հայաստանում միասնական երթուղային ցանց կգործարկվի։ Միասնական ցանցը նախատեսում է յուրաքանչյուր մարզում մեկ օպերատորի առկայություն, որը սպասարկելու է բոլոր երթուղիները, այդ թվում` նրանք, որոնք այսօր ձեռնտու չեն որպես առանձին ուղղություն։

• Արցախում զինծառայող է մահացել գլխի շրջանում արձակած կրակոցից։ Նա Տավուշից էր, 1 տարվա ծառայող։ Միաժամանակ հայտնի դարձավ, որ Ստեփանակերտի կենտրոնական զինվորական հոսպիտալում ՊԲ մեկ այլ զինծառայող է մահացել։

• Հայ մարզիկները մասնակցեցին ձմեռային Օլիմպիական խաղերի բացման շքերթին։ Օլիմպիական շքերթի ժամանակ Հայաստանի դրոշակակիրն էր դահուկավազորդ Միքայել Միքայելյանը։   

• Ադրբեջանի նախագահ Իլհամ Ալիևը հայտարարել է, որ «Երևանը պատմական ադրբեջանական տարածք է, ինչպես նաև նշել է, որ այդ տարածքների վերադարձը Ադրբեջանի ռազմավարական ու քաղաքական նպատակն է»։ Դրան ի պատասխան` ՀՀ ԱԳՆ–ն «ռասիստական է» անվանել Ադրբեջանի նախագահի տարածքային հավակնությունները։ Մասնավորապես, ՀՀ ԱԳՆ մամուլի քարտուղար Տիգրան Բալայանը հայտարարել է, որ պատմական տարածքները, այդ թվում Երևանը վերադարձնելու մասին Ադրբեջանի նախագահ Իլհամ Ալիևի կոչը «Բաքվի իշխող ռեժիմի ռասիստական ինքնության» դրսևորում է։–0–