Հայտնի են դարձել այն նախարարների անունները, ովքեր կանդամակցեն ՀՀԿ–ին

ԵՐԵՎԱՆ, 24 նոյեմբերի. /Նովոստի–Արմենիա/. Հայտնի են դարձել այն նախարարների անունները, ովքեր կհետևեն վարչապետի օրինակին և կհամալրեն Հայաստանի հանրապետական կուսակցության շարքերը։

Վարչապետ Կարեն Կարապետյանը հինգշաբթի կառավարության նիստում Հայաստանի հանրապետական կուսակցությանը միանալու դիմում ներկայացրեց։

Մասնավորապես, կառավարության նիստից հետո տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը հայտնեց լրագրողներին, որ արդեն ներկայացրել է դիմումը, բայց առայժմ պատասխանը չգիտի։ Խոսելով կուսակցությանն անդամակցելու իր պատճառների մասին` նախարարն ասաց, որ ինքը թիմային խաղացող է։

«Ինձ ոչ ոք չի ստիպում, ես պատրաստվում եմ անդամակցել այն կուսակցությանը, որի գաղափարախոսությունն ուղղված է հայ ժողովրդի բարգավաճմանը։ Վարչապետն ասաց նաև, որ դա պարտադրաբար չէ»,– ասաց Մարտիրոսյանը, ավելացնելով, որ մինչ այդ նա կուսակցության անդամ չի եղել, քանի որ չի աշխատել քաղաքական դաշտում։

Պատասխանելով լրագրողների այն հարցին, որ ՀՀԿ-ն չի վայելում բնակչության վստահությունը, նախարարը նշեց, որ այդ դեպքում կուսակցությունն ընտրություններին մեծամասնություն չէր հավաքի։

Կարապետյանի օրինակին հետևելու են նաև Գյուղատնտեսության նախարար Իգնատի Առաքելյանը, ով արդեն այսօր խոստացել է ՀՀԿ անդամ դառնալու դիմում ներկայացնել:

«Կարծում եմ, որ այսօր ճիշտ կլինի կուսակցության անդամ դառնալը: Դա իմ անձնական որոշումն է, անձնական կարծիքը, և իմ որոշումը ես ինքնուրույն եմ ընդունել: Այն պարտադիր չէ, բայց ես թիմային խաղացող եմ, առավել ևս, որ կուսակցության բոլոր մոտեցումները, գաղափարախոսությունն ինձ հարազատ են թե անվտանգության ապահովման, թե երկրի զարգացման առումներով», - ասաց Առաքելյանը:

Նա ավելացրեց, որ մինչ այս ոչ մի կուսակցության անդամ չի եղել, քանի որ քաղաքականությամբ չի զբաղվել, սակայն միշտ մասնակցել է ընտրություններին և քվեարկել ՀՀԿ-ի և գործող նախագահի օգտին:

Իսկ ՀՀ մշակույթի նախարար Արմեն Ամիրյանը դեռևս զերծ է մնում ՀՀԿ-ի շարքերին միանալուց: «Ես դեռ դիմում չեմ ներկայացրել և դեռ մտածելու ժամանակ ունեմ: Ինչ վերաբերում է վարչապետին, կարծում եմ նա ճիշտ է վարվել», - ասաց Ամիրյանը: -0-