ԵՐԵՎԱՆ, 30 դեկտեմբերի. /Նովոստի-Արմենիա/. Երեկ` դեկտեմբերի 29-ին հայտնի դերասանուհի Նազենի Հովհաննիսյանը իր Facebook-յան էջում գրառում է կատարել, ասելով, որ երկրաշարժ է տեղի ունեցել:
«Երդվում եմ հենց հիմա ամբողջ շենքս ցնցվում է!!!!( էլ ո՞վ է զգում երկրաշարժը: Արդեն մի քանի րոպե: հ.Գ. հոգնածը քիչ էր, հիմա էլ վախից վեր թռա բազմոցից....»,- գրել է նա:
Նրա հետևորդները պատասխանել են, որ նման բան չկա, որից հետո Նազենին թարմացրել է գրառումը, ասելով. «(Թարմացված) Կոմիտասում` բարձրահարկ շենքի բարձր հարկում եմ զգացել, 23:45 -ոտ, գլխապտույտ չէր, կոնկրետ դանդաղ ու թույլ ցնցումների կասկադ էր, բայց զգալի, այնքան, որ արթնացա: Վերևի հարևաններն էլ չէին: Ցնցում էր: Այդքանը»:
Այսօր ԱԻՆ-ի մամուլի ծառայությունը հերքել է երկրաշարժի մասին այդ լուրերը:
«Հարգելի՛ քաղաքացիներ, հայտնում ենք, որ ս.թ. դեկտեմբերի 29-ին 23։00-ից մինչև 24։00 Հայաստանի Հանրապետության տարածքում, մասնավորապես, Երևան քաղաքում երկրաշարժ տեղի չի ունեցել։ Երկրաշարժի դեպքում, ՀՀ ԱԻՆ Սեյսմիկ պաշտպանության տարածքային ծառայությունը, սահմանված կարգով, տեղեկացնում է հանրությանը։ Խնդրում ենք հետևել միայն պաշտոնական հաղորդագրություններին»,- ասվում է ԱԻՆ-ի հաղորդագրւթյան մեջ:-0-