Հարուցվել է քրեական գործ՝ ընտրատեղամասերից մեկում այլ անձանց փոխարեն քվեարկելու դեպքի առթիվ

ԵՐԵՎԱՆ, 7 դեկտեմբերի. /Նովոստի–Արմենիա/. ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ թիվ 30/21 ընտրատեղամասում այլ անձանց փոխարեն քվեարկելու դեպքի առթիվ, հաղորդում է ՀՀ քննչական կոմիտեի մամուլի ծառայությունը։

«2015 թվականի դեկտեմբերի 6-ին՝ ժամը 16:10-ին, Վանաձոր քաղաքի բնակչուհի Ս.Սողոմոնյանից գրավոր հաղորդում է ստացվել առ այն, որ նույն օրը՝ ժամը 14:50-ին, ՀՀ Սահմանադրական փոփոխությունների հանրաքվեին մասնակցելու նպատակով այցելել է Վանաձոր քաղաքի  Նիզամի 49 հասցեում գտնվող թիվ 30/21 ընտրատեղամաս՝ ընտրություն կատարելու, սակայն պարզել է, որ ինքնությունը չպարզված անձը քվեարկել է իր ծնողների և եղբոր փոխարեն», – նշվում է հաղորդագրության մեջ։

Դեպքի առթիվ ՀՀ քննչական կոմիտեի Լոռու մարզային քննչական վարչությունում 2015 թվականի դեկտեմբերի 6-ին հարուցվել է քրեական գործ՝ ՀՀ քրեական օրենսգրքի 153-րդ հոդվածի հատկանիշներով։

Կատարվում է քննություն, ձեռնարկվում են անհրաժեշտ քննչական գործողություններ՝ դեպքի բոլոր հանգամանքները պարզելու, առերևույթ հանցագործություն կատարած անձի ինքնությունը պարզելու ուղղությամբ։

Կիրակի Հայաստանում տեղի ունեցավ սահմանադրական բարեփոխումների համահանրապետական հանրաքվեն։ Քվեարկությանը մասնակցել է 1 296 368 ընտրող կամ ընդհանուր ընտրազանգվածի 50,51 տոկոսը։

ԿԸՀ–ի տվյալներով` բարեփոխումների օգտին քվեարկել է հանրաքվեի մասնակիցների 63,35 տոկոսը կամ ընտրացուցակներում ներառվածների 32,17 տոկոսը։ Դեմ է քվեարկել 32,35 տոկոսը կամ ընտրացուցակներում ներառվածների 16,42 տոկոսը:

Սահմանադրական բարեփոխումներով նախատեսվում է անցում կատարել խորհրդարանական իշխանավարման։–0–