Աշխատողներն այսուհետ կարող են աշխատանքի հետ կապված իրենց բողոքները ներկայացնել առցանց. գործարկվել է Employeeprotect.am հարթակը
ԵՐԵՎԱՆ, 22 հոկտեմբերի./Նովոստի–Արմենիա/. ՀՀ առողջապահության և աշխատանքի տեսչական մարմինը 2021 թ.-ի հոկտեմբերից գործարկել է Employeeprotect.am բողոքների ընդունման էլեկտրոնային հարթակը։ Գործարկման նպատակն է բարձրացնել աշխատանքային իրավունքների պաշտպանության համակարգը։
Այս մասին այսօր հայտնեց ՀՀ առողջապահության և աշխատանքի տեսչական մարմնի աշխատանքային օրենսդրության վերահսկողության վարչության պետ Իգիթ Հակոբյանը:
Նրա խոսքով՝ հարթակում իրենց բողոքները կարող են ներկայացնել և´ պետական, և´ մասնավոր սեկտորի աշխատողները: Հայտի ներկայացումը բաղկացած է 4 փուլից:
«Առաջին քայլով օգտատերը տեղեկատվություն է ներկայացնում, թե որ կազմակերպությունում է աշխատել, նշում է կազմակերպության գտնվելու վայրը, և իր` որ աշխատանքային իրավունքն է խախտվել: Երկրորդ քայլով առավել մանրամասն ներկայացնում է դեպքը, որից հետո հարթակը հնարավորություն է տալիս օգտատիրոջը իր հայտին կցել նաև լուսանկարներ, տեսանյութեր կամ ձայնագրություններ, ինչպես նաև այլ ապացուցողական նշանակություն ունեցեղ նյութեր: Եվ վերջին քայլով հայտը մուտքագրում է համակարգ», – ասաց Հակոբյանն` ավելացնելով, որ եթե ներկայացված բողոքը գտնվում է իրենց գերատեսչության իրավասության շրջանակներում, ապա նրանք ձեռանրկում են համապատասխան քայլեր:
Նա նշեց, որ հարթակը բաղկացած է 6 բաժիններից, որտեղ տեղեկություններ կան տեսչական մարմնի գործառույթների մասին, հարթակի մասին, ինչպես նաև կա նորություններ բաժինը, որտեղ աշխատանքային իրավունքի ոլորտին վերաբերող վերջին նորություններն են ներկայացվում: Կա նաև հաջողության պատմություններ պատուհանը, որտեղ ներկայացված են դրական փոփոխությունները, որոնք արձանագրվել են տեսչական մարմնի կողմից իրականցված ստուգումների արդյունքում:
Հակոբյանը նշեց, որ 2021 թ.-ի ընթացքում աշխատանքային օրենսգրքի վերահսկողության ոլորտում հարուցվել է 286 վարչական վարույթ, որից 200՝ դիմումների հիման վրա:
«Վարչական վարույթների արդյունքում ընդունվել է 81 վարչական ակտ, որի արդյունքում տրվել է խախտումները վերացնելու կարգադրագրեր: Հարուցված վարչական վարույթներից 149-ը կառճվել է, որից 64-ը՝ դիմումից հրաժարվելու հիմքով»,-ասաց Հակոբյանը:
Նա նշեց, որ ստացված 200 դիմում բողոքներից 197-ը վերաբերել է աշխատանքային օրենսդրության խախտումներին, իսկ 3-ն` աշխատողների առողջության պահպանման և անվտանգության ապահովմանը:
«Խախտումներից 113-ը վերաբերել է օրենքով սահմանված կարգով վերջնահաշվարկ չկատարելուն և սահմանված ժամկետներում աշխատավարձերը չվճարելուն: 43-ը աշխատանքային պայմանագրերի լուծարման կարգը չպահպանելուն, 41-ն էլ աշխատանքային օրենսդրության այլ իրավախախտումներին են վերաբերել»,- ընդգծեց Առողջապահության և աշխատանքի տեսչական մարմնի աշխատանքային օրենսդրության վերահսկողության վարչության պետը:
Նրա խոսքով, այս փոփոխությունները մի ճանապարհ են, որպեսզի աշխատողների համար ստեղծվեն արտադատական հնարավորություններ՝ իրենց աշխատանքային իրավունքները պաշտպանելու նպատակով:
Տեսչական մարմնի աշխատանքային օրենսդրության իրավական վերահսկողության բաժնի պետ Ալվարդ Արշակյանի խոսքով էլ խախտումները, հիմնականում տեղի են ունենում գործատուի տեղեկացված չլինելու պատճառով:–0–
