ԵՐԵՎԱՆ, 6 հոկտեմբերի. /Նովոստի–Արմենիա/. Երևանում կիրակի՝ հոկտեմբերի 6-ին, կայացել է DigiTec2019 հոբելյանական 15-րդ տեխնոլոգիական ցուցահանդեսի բացումը: Բացման հանդիսավոր միջոցառմանը մասնակցել է Infosys կորպորացիայի համահիմնադիր Նարայանա Մուրթին:
Նահավարա Ռամարայո Նարայանա Մուրթին հնդիկ գործարար է, Infosys բազմազգ կորպորացիայի համահիմնադիր: Մուրթին ներառվել է մեր ժամանակների 12 մեծագույն ձեռնարկատերի ցանկում՝ ըստ Fortune ամսագրի:
Ինչպես բացման արարողությանը նշեց ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը, հոբելյանական Digitec-2019 կարող է աննախադեպ դառնալ այցելուների թվով և հյուրերի կարևորությամբ:
«Մենք անցկացնում ենք այս ցուցահանդեսը 2014 թ.-ից սկսած: Այդ ժամանակ մասնակցում էին ընդամենը 30 տեղական ընկերություններ, միջոցառմանն այցելեց 4 հազար մարդ: Արդեն այսօր կարող ենք լուրջ առաջընթաց գրանցել: Եթե 2018 թ.-ին ցուցահանդես այցելեց ավելի քան 80 հազար մարդ, ապա առաջիկա 3 օրերի ընթացքում մտադիր ենք ունենալ 100 հազար այցելու», - ասաց նա:
Ըստ Վարդանյանի, ցուցահանդեսը 15 տարիների ընթացքում դարձել է ՏՏ ոլորտի ամենախոշոր միջազգային միջոցառումներից մեկը, որն անկացվում է Հայաստանում:
«Ցուցահանդեսի կարևորության մասին վկայում է այն փաստը, որ բացման արարողությանը մասնակցում է Նարայանա Մուրթին: Մենք նաև հյուրեր ունենք Դուբայից, Մալայզիայից, Իրանից, Թայվանից և ՏՏ ոլորտի այլ համաշխարհային կենտրոններից», - ասաց նա:
Վարդանյանը նշեց, որ Տեղեկատվական տեխնոլոգիաների համաշխարհային կոնգրեսի (WCIT 2019) հետ DigiTec2019-ի զուգահեռ անցկացումը հնարավորություն կտա ներկայացնել Հայաստանը նոր տեսանկյունից:
ՀՀ բարձր տեխնոլոգիական արդյունաբերության նախարար Հակոբ Արշակյանն իր հերթին շնորհակալություն հայտնեց Վարդանյանին՝ DigiTec2019 ցուցահանդեսի ստեղծման և կայացման գործում ունեցած անձնական ներդրման համար:-0-
