Ցուցարարները բարի գիշեր մաղթեցին ոստիկաններին ու հեռացան Բաղրամյանից

ԵՐԵՎԱՆ, 18 ապրիլի./Նովոստի–Արմենիա/. Չորեքշաբթի երեկոյան ՀՀ վարչապետի նստավայրի մոտ հավաքված ցուցարարներին դիմավորեցին մեծ թվով ոստիկաններ։

Իրավապահները փակեցին ոչ միայն վարչապետի նստավայրի մուտքն ու Բաղրամյան–Պռոշյան խաչմերուկը, այլև մետրոյի «Մարշալ Բաղրամյան» կայարանի մուտքը։

Ակցիայի մասնակիցները, սակայն, ոստիկաններին ցանկացան բարի գիշեր, շրջվեցին ու շարժվեցին դեպի Ֆրանսիայի հրապարակ։

Նիկոլ Փաշինյանը շնորհակալություն հայտնեց ցուցարարներին շարժման հիմնական սկզբունքն ու գաղափարը (բոլոր գործողությունների բացառապես խաղաղ բնույթը) պահպանելու համար։

ՀՀ ոստիկանությունը քիչ առաջ հայտարարություն է տարածել` կոչ անելով պահպանել ակցիայի խաղաղ և բնականոն ընթացքն ու բացառել սադրանքներն ու հասարակական կարգի խախտումները: Ոստիկանությունը հավաքի կազմակերպիչներին հորդորել է դրսևորել զսպվածություն և տուրք չտալ արկածախնդրության:

Ինչպես հայտարարել է Փաշինյանը Հանրապետության հրապարակում կազմակերպված հանրահավաքի ժամանակ, վաղը ակցիաները կմեկնարկեն առավոտյան ժամը 08։00–ին Հանրապետության հրապարակում։ Ցուցարարները մտադիր են արգելափակել կառավարության շենքն ու պետական այլ կառույցներ։–0–