Չորեքշաբթի` հունիսի 15–ի առավել ուշագրավ նորությունները

ԵՐԵՎԱՆ, 16 հունիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է չորեքշաբթի` հունիսի 15–ի առավել ուշագրավ նորությունների սեփական տարբերակը։

• ԵԱՀԿ–ն չի մասնակցում Սանկտ Պետերբուրգում Ռուսաստանի, Հայաստանի և Ադրբեջանի նախագահների եռակողմ գագաթնաժողովի նախապատրաստական աշխատանքներին, որը նվիրված է ղարաբաղյան հակամարտության կարգավորմանը, հաղորդել է ԵԱՀԿ–ի մամուլի հետ կապերի բաժնի ղեկավարի պաշտոնակատար Նատաշա Ռաջակովիչը։ Միաժամանակ, այս կապակցությամբ իր կարծիքն է հայտնել ՀՀ ԱԺ փոխխոսնակ Էդուարդ Շարմազանովը` նշելով, որ Հայաստանի, Ռուսաստանի և Ադրբեջանի նախագահների` հունիսի 20-ին սպասվող եռակողմ հանդիումը չպետք է ԵԱՀԿ Մինսկի խմբի համանախագահների հետ տարաձայնության պատճառ դառնա։

• Հունիսի 14–ին շղթայական ավտովթար է տեղի ունեցել Երևանում` հայտնի հեռուստահաղորդավարի մասնակցությամբ։

• Հարավային Օսեթիայի խորհրդարանը առաջիկա նիստի ժամանակ կքննարկի 1915 թ.-ին Օսմանյան կայսրությունում տեղի ունեցած Հայոց ցեղասպանության ճանաչման հարցը: «Հայ ժողովրդի ցեղասպանության ճանաչումը քննարկվել է Հարավային Օսեթիայի օրենսդիր մարմնում դեռևս անցած տարի, սակայն հայկական համայնքը պաշտոնապես դիմել է խորհրդարան երեքշաբթի», - հայտնել են խորհրդարանի մամուլի ծառայությունից:

• ՀՀ նախագահ Սերժ Սարգսյանի հրամանագրով` Ֆադեյ Չարչօղլյանը նշանակվել է Հունաստանում ՀՀ արտակարգ և լիազոր դեսպան։ Նախագահի մեկ այլ հրամանագրով` Գագիկ Ղալաչյանն ազատվել է Հունաստանում, Ալբանիայում, Կիպրոսում, Սերբիայում, Բոսնիա և Հերցեգովինայում ՀՀ արտակարգ և լիազոր դեսպանի պաշտոնից:

• Շուրջ 135 ֆիլմեր կներկայացվեն Երևանում հուլիսի 10–17–ը նախատեսված «Ոսկե ծիրան» միջազգային 13–րդ փառատոնի մրցութային և արտամրցութային ծրագրերում։ «Այս տարի անցկացվող «Ոսկե ծիրանը» մեզ համար ունի առանձնահատուկ նշանակություն, քանի որ այս տարի մենք նշում ենք Հայաստանի անկախության 25–րդ տարեդարձը, չէ՞ որ փառատոնն այդ անկախության ծնունդն է», –նշեց ՀՀ մշակույթի նախարար Հասմիկ Պողոսյանը։ -0-