Չորեքշաբթի` հոկտեմբերի 12–ի առավել ուշագրավ նորությունները

ԵՐԵՎԱՆ, 13 հոկտեմբերի. /Նովոստի–Արմենիա/. «Նովոստի–Արմեիա» գործակալությունը ներկայացնում է չորեքշաբթի` հոկտեմբերի 12–ի առավել ուշագրավ նորությունների սեփական տարբերակը։

• Հայաստանի ֆուտբոլի հավաքականն արտագնա խաղում զիջեց լեհերին աշխարհի 2018 թ.–ի առաջնության ընտրական փուլի շրջանակում կազմակերպված հանդիպման վերջին վայրկյաններին։ Հայաստանի ազգային հավաքականի գլխավոր մարզիչ Վարուժան Սուքիասյանը հանդիպումից հետո կազմակերպված ասուլիսի ժամանակ շնորհակալություն է հայտնել տղաներին։ Միաժամանակ, Լեհաստանի հավաքականի ավագ Ռոբերտ Լևանդովսկին հայտարարել է, որ Հայաստանի հետ հանդիպումը դժվար կլինի մոռանալ։

• ՀՀ վարչապետ Կարեն Կարապետյանի որոշմամբ, Կարեն Թամազյանը նշանակվել է ՀՀ ֆինանսների նախարարի տեղակալ։

• Հանրապետության հանրակրթական դպրոցներում հոկտեմբերի 24-ից կսկսվի աշնանային արձակուրդը։ Միաժամանակ, ՀՀ կրթության և գիտության նախարար Լևոն Մկրտչյանը հրաման է ստորագրել` հանրակրթական ուսումնական հաստատություններում 12-րդ դասարանի ուսումնական գործընթացը կազմակերպելու ընթացակարգը հաստատելու մասին, ըստ որի Հայաստանում ավագ դասարանների աշակերտները կարող են ընտրել վերջին կիսամյակի առարկաները։

• Հայաստանի ազգային կինոակադեմիայի առաջադրած «Երկրաշարժ» ֆիլմը չի ընդգրկվել «Օսկարի» 89–րդ մրցանակաբաշխության «Լավագույն օտարալեզու ֆիլմ» անվանակարգի հիմնական ցուցակում։–0–