Բողոքի ակցիայի մասնակիցները կրկին շարժվեցին դեպի ԿԸՀ–ի շենք

ԵՐԵՎԱՆ, 7 դեկտեմբերի. /Նովոստի–Արմենիա/. Բողոքի ակցիայի  մասնակիցները, ովքեր պահանջում են չեղարկել սահմանադրական բարեփոխումների հանրաքվեի արդյունքները,  կրկին շարժվեցին դեպի ԿԸՀ–ի շենք։

Ցուցարարներն օրվա ընթացքում արդեն երկրորդ անգամ են շարժվում Ազատության հրապարակից դեպի ԿԸՀ–ի շենք։

«Նոր Հայաստան» ընդդիմադիր ճակատի առաջնորդներից մեկը` «Ժառանգություն» կուսակցության ղեկավար Րաֆֆի Հովհաննիսյանը պահանջեց, որպեսզի ՀՀ ոստիկանապետ Վլադիմիր Գասպարյանն ու ԱԱԾ տնօրեն Գորիկ Հակոբյանը պատժեն մեղավորներին։

Նրա խոսքով` երկուշաբթի նա կմեկնի Հայաստանի հյուսիս` 1988 թ.–ի դեկտեմբերի 7–ին գրանցված երկրաշարժի զոհերի հիշատակը հարգելու համար, իսկ ընդդիմադիրների վաղվա հանրահավաքը տեղի կունենա ժամը 16։00–ին։

«Ժառանգության» ղեկավարներից մեկը` Արմեն Մարտիրոսյանն իր հերթին տեղեկացրեց, որ ընտրատեղամասերից մեկում կուսակցության ներկայացուցիչ Հրայր Մանուկյանը մեկուսացվել է, և նրանք հիմա շարժվում են ԿԸՀ` իրավիճակը պարզելու նպատակով։

Սահմանադրական բարեփոխումներով նախատեսվում է անցում կատարել խորհրդարանական իշխանավարման։

Նոր Սահմանադրության նախագծի համաձայն` Հայաստանի նախագահը, որի լիազորությունները զգալիորեն կկրճատվեն, ընտրվում է յոթ տարով (ներկա հինգի փոխարեն) ոչ թե համազզային քվեարկության, այլ խորհրդարանի միջոցով։ Միևնույն մարդը կարող է նախագահի պաշտոնում ընտրվել միայն մեկ անգամ։

Նախատեսվում է, որ առաջին փուլում պետության ղեկավարը պետք է ընտրվի պատգամավորների ձայների ¾–ով, իսկ եթե դա չհաջողվի, ապա նշաձողն իջեցվում է մինչև 3/5։ Եթե այս դեպքում ևս ընտրություններն արդյունքի չհանգեցրին, ապա նախագահը կընտրվի պատգամավորների ընդհանուր թվի մեծամասնությամբ։

Ըստ փաստաթղթի` գործադիր իշխանության բարձրագույն մարմինը կառավարությունն է, որը մշակում և իրականացնում է ներքին և արտաքին քաղաքականությունը` սեփական ծրագրի հիման վրա։ Կառավարությունը նաև ղեկավարում է պետական կառավարման համակարգը։

Նոր նախագծով` նախագահը վարչապետի պաշտոնում նշանակում է խորհրդարանական ընտրություններում հաղթած կուսակցության կամ դաշինքի թեկնածուներից մեկին։–0–