Բժիշկները միջոցներ են ձեռնարկում ավտոբուսի պայթունից տուժած դեռահասների մոտ ինֆեկցիոն բարդություններից խուսափելու համար

ԵՐԵՎԱՆ, 27 ապրիլի./Նովոստի–Արմենիա/. Երևանի «Սուրբ Աստվածամայր» բժշկական կենտրոնում գտնվող ավտոբուսի պայթյունից տուժած 14 և 15 տարեկան պատանիների առողջական վիճակը կայուն է, երկուսն էլ գիտակցության մեջ են, հաղորդում է ՀՀ ԱՆ մամուլի ծառայությունը։

Ինչպես արդեն տեղեկացվել էր, տղաներին կատարվել է վերքերի մշակում, օտար մարմիննների հեռացում,  ինչպես նաև այլ գործողություններ: Նման խորը վերքերի դեպքում առկա է առաջնային ինֆեկցիայի ներթափանցման վտանգ: Բուժօգնությունն այս փուլում ուղղված է վարակների կանխարգելմանը: 

ԶԼՄ–ները հայտնում են ավտոբուսի պայթյունի մեջ կասկածվող տղամարդու անունը>>

Այսօրվա տվյալներով` «Արմենիա» հանրապետական բժշկական կենտրոնի տարբեր բաժանմունքներում բուժում է ստանում պայթյունից տուժած 3 քաղաքացի, որոնց վիճակը բժիշկները գնահատում են լավ:  Նրանցից մեկը` 14-ամյա աղջիկը, պատրաստվում է դուրս գրման: 

Բժշկական հաստատությունից երեկ դուրս է գրվել նաև  62-ամյա կինը, ով պատահարից ժամեր անց էր տեղափոխվել հիվանդանոց: 

Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտում բուժումը շարունակում է վթարից տուժած 37-ամյա հղի կինը:  Նրա առողջական վիճակը գնահատվում է բավարար: Նա ունի սալջարդեր, արյունազեղումներ, որոնք երկրորդային են, այս պահին առաջնային է հղիության պահպանումը:

«Պտուղը չի տուժել, սակայն հետագա հետսթրեսային բարդություններից խուսափելու համար անհրաժեշտ է մշտական հսկողություն», – նշվում է հաղորդագրության մեջ։

Պարբերաբար կազմակերպվում են նաև նեղ մասնագիտական` ակնաբույժի, նյարդաբանի խորհրդատվություններ: Ներկա դրությամբ կնոջ և պտղի կյանքին վտանգ չի սպառնում: 

Տուժածների առողջական վիճակի հսկողությունը ՀՀ առողջապահության նախարար Արմեն Մուրադյանի անմիջական ուշադրության կենտրոնում է: 

Ապրիլի 25ժօմ ժամը 21։51–ի սահմաններում ահազանգ է ստացվել, որ Հալաբյան փողոցում` «Թումո» ստեղծարար տեխնոլոգիաների կենտրոնից ոչ հեռու, N63 ավտոբուսում պայթյուն է տեղի ունեցել։ Ճշտված տվյալներով, ավտոբուսի պայթյունի հետևանքով երկու մարդ է զոհվել, յոթ տուժածներ հոսպիտալացվել են, այդ թվում` անչափահասներ և հղի կին։ –0–