«Ինքնաթիռ, տանկ, Bentley և BMW». ՀՖՖ-ի նախկին նախագահը մեկնաբանել է իր առանձնատան խուզարկությունը

ԵՐԵՎԱՆ, 13 դեկտեմբերի./Նովոստի-Արմենիա/. Այսօր ՀՖՖ-ի նախկին նախագահ, ԱԺ նախկին պատգամավոր Ռուբեն Հայրապետյանի առանձնատանը խուզարկություն է անցկացվել: Հայրապետյանը դուրս է եկել լրագրողների մոտ:

«Միանգամից ասեմ, որ հարցերին չեմ պատասխանելու: Ինձ չեն ձերբակալել և չեն ձերբակալելու»,- ասել է Հայրապետյանը:

Հարցին, թե արդյոք ինչ որ բան հայտնաբերել են խուզարկության ժամանակ, նա կատակել է. «Այո, ինքնաթիռ, տանկ, մի քանի Bentley և BMW»:

«Համբերեք, այսօր երեկոյան ամեն ինչ կլսեք»,- ասել է Հայրապետյանը:

Ավելի վաղ «Նովոստի–Արմենիա» գործակալությանը ոստիկանության մամուլի ծառայությունից տեղեկացրել էին, որ ոստիկանության կազմակերպված հանցավորության դեմ պայքարի գլխավոր վարչությունում պատրաստվում են նյութեր, որոնք վերաբերում են ՀՖՖ նախկին նախագահ, նախկին պատգամավոր Ռուբեն Հայրապետյանին։ Մամուլի հրապարակումների համաձայն, Ռուբեն Հայրապետյանը «Զարգացման հայկական բանկի» և «Զեյթունի կահույքի ֆաբրիկա» ԲԲԸ–ի փաստացի սեփականատերն է։ 2012–2018թթ.–ին, զբաղեցնելով ՀՖՖ նախագահի պաշտոնը, Հայրապետյանը ՀՀ մի քանի քաղաքներում կազմակերպել է ֆուտբոլի մարզադաշտերի ու մարզադպրոցների կառուցման և վերանորոգման աշխատանքներ, որոնց ընթացքում չի կատարել և մասնակի է կատարել պայմանագրերով նախատեսված պարտավորությունները և յուրացրել առանձնապես խոշոր չափերի գումարներ։–0–