Բացառիկ «աստղային անձրև է» սպասվում հայաստանյան երկնքում

ԵՐԵՎԱՆ, 13 նոյեմբերի. /Նովոստի–Արմենիա/. Հայաստանի բնակիչները նոյեմբերի 18–ի գիշերը կարող են դառնալ հզոր ասուպային հոսքի ականատեսը, «Նովոստի–Արմենիա» գործակալությանը տեղեկացրեց Բյուրականի աստղադիտարանի տնօրեն Արեգ Միքայելյանը։

«Դա հետաքրքիր երևույթ է, որը կտևի մի քանի օր։ Նոյեմբերի 17–ի լույսի 18–ի գիշերը կգրանցվի հոսքի գագաթնակետը։ Սակայն «աստղային անձրևը» հնարավոր կլինի տեսնել ոչ թե Երևանում, այլ քաղաքներից հեռու։ Կլինեն ևս մի քանի հոսքեր, սակայն սա կլինի հզորներից մեկը», – ասաց Միքայելյանը։

Ամենապայծառ ասուպային հոսքերից մեկը կոչվում է Առյուծային (Լեոնիդներ)։ Չնայած քիչ հաճախականությանը, այն գերում է իր պայծառությամբ, ինչպես նաև բարձր արագությամբ` հոսքի տիպիկ արագությունը կազմում մոտ 70 կմ/ժ։

«Աստղային անձրևին» կարելի է հետևել 22։00–ից հետո։ Հաջորդ անգամ Լեոնիդների նման ակտիվություն կանխատեսվում է 2034 թ.–ին։–0–