Արդյո՞ք ԱԳՆ–ն նպաստել է հետախուզվողին երկրից դուրս գալ. պարզաբանում է ԱԳՆ մամուլի քարտուղարը

ԵՐԵՎԱՆ, 26 ապրիլի./Նովոստի–Արմենիա/. ՀՀ ԱԳՆ մամուլի քարտուղար Տիգրան Բալայանը պատասխանել է թերթերից մեկի հրապարակմանը, որտեղ նշվում է, որ ԱԳՆ–ն տեղեկանք է տրամադրել հետախուզվող քաղաքացուն երկրից դուրս գալու համար։

«Ժողովուրդ» թերթի հաղորդմամբ, այդ քաղաքացին Երևանի բնակիչ Արսեն Հակոբյանն է, ով հետախուզման մեջ է գտնվել ՌԴ իրավապահ մարմինների կողմից՝ գողություն կատարելու մեղադրանքով: Հայաստանում հայտնվելուց հետո նա ԱԳՆ-ից կարողացել է փաստաթուղթ ստանալ, որ իբր հետախուզման մեջ չէ, և ճողոպրել է:

«Ցածրորակ լրագրությունը մնալու է այդպիսին, եթե հենց հեղինակները չեն ուզում կատարելագործվել, կրթվել։ Հակառակ դեպքում, կդիմեին ԱԳՆ, կիմանային, որ ԱՄՆ դեսպանություն կեղծ փաստաթուղթ է ներկայացվել։ Այդ կապակցությամբ ԱԳՆ-ն դիմել է ՀՀ գլխավոր դատախազություն և Ոստիկանություն՝ համապատասխան գործողություններ իրականացնելու համար», – գրել է Բալայանը Facebook–յան իր էջում։–0–