Առանց դեղատոմսի և դեղատոմսով դեղերի արագ որոնման համակարգ է գործարկվել Հայաստանում

ԵՐԵՎԱՆ, 5 մարտի. /Նովոստի–Արմենիա/. Հայաստանում գործարկվել է առանց դեղատոմսի և դեղատոմսով դեղերի արագ որոնման համակարգ։

Մարտի 1–ից Հայաստանում ուժի մեջ է մտել «Դեղատոմսերի ձևերը, դեղատոմսեր գրելու, դեղեր բաց թողնելու (ներառյալ՝ էլեկտրոնային եղանակով) կարգը, ինչպես նաև դեղերի և դեղանյութերի հաշվառման կարգը սահմանելու մասին» կառավարության որոշումը։ 

Որոշումն ուժի մեջ մտնելուց հետո երկրում գրանցված 4700 անուն դեղերից 2700–ը բաց է թողնվում բացառապես դեղատոմսով։

Մարտի 1–ից դեղատոմսով վաճառվում են հակաբիոտիկներ, հորմոնալ և կոդեին պարունակ դեղերը, հուլիսի 1–ից դեղատոմսով կվաճառվի նաև ներարկումային և օնկոլոգիական դեղորայքը, իսկ հոկտեմբերի 1–ից` մնացած բոլոր դեղերը, որոնք նախատեսված են կառավարության որոշմամբ։

ՀՀ առողջապահության նախարարությունն արդեն հրապարակել է դեղորայքի ամբողջական ցանկը, որոնք բաց են թողնվելու դեդատոմսով։ Այժմ գործարկվել է մի համակարգ (mydrugs.am), որի օգնությամբ կարելի է արագորեն գտնել առանց դեղատոմսի և դեղատոմսով բաց թողնվող դեղերը, պարզապես հարկավոր է նախատեսված դաշտում հայերենով մուտքագրել դեղի անունը։

Ըստ կայքում նշված տեղեկատվության, համակարգում տեղ գտած տվյալները տրամադրված են ՀՀ առողջապահության նախարարության կայքից։–0–