Երևանում ժամանակակից ատրակցիոններով ժամանցի և հանգստի բացառիկ կենտրոն կհայտնվի

ԵՐԵՎԱՆ, 11 հունվարի. /Նովոստի–Արմենիա/. ՀՀ կառավարությունը հինգշաբթի նիստի ժամանակ ընդունել է «Ներդրումային ծրագրին հավանություն տալու և «Պարկ գրուպ» ՍՊԸ առանց մրցույթի հողամաս տրամադրելու մասին» որոշումը։

Ներդրումային ծրագրով նախատեսվում է Երևանում ստեղծել մանկական, երիտասարդական, ընտանեկան հանգստի և ժամանցի կենտրոն։

Ինչպես ծրագիրը ներկայացնելիս նշեց Երևանի քաղաքապետ Տարոն Մարգարյանը, «Պարկ Գրուպ» ՍՊԸ–ն մտադիր է ծրագրում ներդնել մոտ 22 մլն դոլար։


Նրա խոսքով, հանգստի գոտին կիրականացվի Մոնթե Մելքոնյան փողոցին հարակից մոտ 27 հա տարածքում («Դալմա» առևտրի կենտրոնի մոտակայքում)։

Եվրոպական բոլոր չափորոշիչներին համապատասխանող հանգստի գոտու շինարարությունը նախատեսվում է ավարտել 5 տարում։ Կենտրոնում նախատեսվում է նաև կառուցել ժամանակակից ատրակցիոններ։

Մարգարյանը լրագրողների հետ զրույցում, նշեց, որ ժամանցի և հանգստի նմանատիպ գոտին առաջինն է լինելու տարածաշրջանում։

«Երեք ամսում կավարտվի փաստաթղթերի ձևակերպման գործընթացը, իսկ հինգ տարի անց տեղի կունենա հանգստի գոտու բացումը։ Էսքիզին նայելով` հասկանում ենք, որ հանգստի գոտին համապատասխանելու է եվրոպական բոլոր չափանիշներին», – ասաց Երևանի քաղաքապետը։–0–