Երևանում ծնված հնգյակից ողջ մնացած աղջիկն առողջ է. շուտով կդառնա 6 ամսական (ՖՈՏՈ)
ԵՐԵՎԱՆ, 12 հոկտեմբերի. /Նովոստի–Արմենիա/. Մայիսի 3-ին Երևանում հնգյակ էր ծնվել` 4 աղջիկ և 1 տղա։
Բայց նրանք խորն անհասության պատճառով (ծնվել են 28-շաբաթականում) ծայրահեղ ծանր վիճակում էին, ու ողջ մնաց միայն աղջիկներից մեկը` Ռոզին։
Փոքրիկի հոր՝ Վարդան Կարապետյանի խոսքով, Ռոզին իրեն լավ է զգում, առողջական խնդիրներ չունի, մեծանում է, հաղորդում է armtimes–ը։
Աղբյուրի փոխանցմամբ, շուտով փոքրիկը կդառնա 6 ամսական:Երեխան այժմ կշռում է մոտ 5 կգ: Ծնողները շարունակում են ամեն ամիս նրան տանել Մոր և մանկան առողջության պահպանման գիտահետազոտական կենտրոն («Մարգարյան» ծննդատուն)՝ բուժզննության ենթարկվելու:
Ռոզիի հայրը նաև նշել է, որ արդեն տեղափոխվել են իրենց նոր բնակարան, որը նվիրաբերել էր Մայր Աթոռը:
Նշենք, որ ընտանիքը մինչ այդ ապրում էր Մեծամորի հանրակացարանում՝ ամուսնու հարազատների հետ միասին: Երեխաների ծնվելուց հետո նրանց օգնության ձեռք մեկնեցին նաև տարբեր գործարարներ:–0–
