ԵՐԵՎԱՆ, 19 փետրվարի./Նովոստի–Արմենիա/. ՀՀ քննչական կոմիտեի վարույթ է ընդունվել Երևանի քաղաքապետարանում տեղի ունեցած միջադեպի գործը, երկուշաբթի «Նովոստի–Արմենիա» գործակալությանը տեղեկացրեց ՀՀ ՔԿ նախագահի խորհրդական Սոնա Տռուզյանը։
Հիշեցնենք, որ փետրվարի 13–ին Երևանի քաղաքապետարանում կայացած Ավագանու նիստի ժամանակ Երկիր Ծիրանի» կուսակցության անդամ Մարինա Խաչատրյանը կոյուղու ջուր էր բերել նիստին` ցանկանալով այն փոխանցել Տարոն Մարգարյանին։ Այս կերպ նա փորձում էր հնչեցնել Նուբարաշենի կոյուղաջրերի խնդիրը։ ՀՀԿ խմբակցության ներկայացուցիչները խոչընդոտել են դրան և փորձել խանգարել ընդդիմադիրներին փոխանցել կեղտաջուրը քաղաքապետին։ Այդ պահին Տարոն Մարգարյանն ընդմիջում է հայտարարել, որի ընթացքում Ավագանու խորհրդի անդամների միջև ծեծկռտուք է սկսվել։
Загружается новость ... "Лево"
«Գործը ոստիկանությունից ուղարկվել է ՔԿ։ Նյութերը կուսումնասիրվեն, ինչից հետո կձեռնարկվեն կոնկրետ միջոցներ, և մենք կկարողանանք հայտարարել հարուցվել է քրեական գործ, թե ոչ և որ հոդվածներով», – պարզաբանեց Տռուզյանը։
Ոստիկանությունն ավելի վաղ Երևանի քաղաքապետարանում գրանցված ծեծկռտուքի փաստով հարուցել էր քրեական գործ ՀՀ ՔՕ 118–րդ հոդվածի (ծեծ) և 258–րդ հոդվածի 1–ի մասի ( Խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով և զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով) հատկանիշներով։–0–
