Երևանի Սբ. Կաթողիկե եկեղեցու ապակեպատ մուտքի գաղափարը համաձայնեցվել է մասնագետների հետ. ԱՀԹ (ԼՈւՍԱՆԿԱՐ)

ԵՐԵՎԱՆ, 27 դեկտեմբերի. /Նովոստի–Արմենիա/. Երևանի Սուրբ Աստվածածին (Կաթողիկե, XVII դար) եկեղեցու ապակեպատ մուտքի գաղափարը, որը մեծ քննարկումների առարկա դարձավ սոցցանցերում, համաձայնեցվել է մասնագետների հետ, «Նովոստի–Արմենիա» գործակալությանն ասաց Արարատյան Հայրապետական թեմի տեղեկատվական բաժնի հոգևոր պատասխանատու Տ. Եսայի քահանա Արթենյանը։

Facebook–ում հրապարակված լուսանկարը, որտեղ երևում է եկեղեցու ապակեպատ մուտքը, առաջացրել է բազմաթիվ օգտատերերի դժգոհությունը, որոնց կարծիքով, նորամուծությունը չի համապատասխանում եկեղեցու ընդհանուր ճարտարապետությանը։

«Նպատակահարմար է նկատվել այդ լուծումը տալ, որը չի աղավաղում պատմական հուշարձանի տեսքը: Մասնագետների հետ անհրաժեշտ համաձայնությունները կատարվել են: Աշխատանքները ճիշտ են արել թե ոչ, թող այդ հարցին պատասխան տան մասնագետները, առանձին անհատներին կարող է դուր գալ կամ դուր չգալ տրված լուծումը», – նշել է քահանան։

Արարատյան Հայրապետական թեմի տեղեկատվական պատասխանատու Նոեմի Անդրիասյանն իր հերթին նշեց, որ բոլոր աշխատանքներն իրականացվել են ճարտարապետական հանձնախմբի թույլտվությամբ։

Սուրբ Կաթողիկեն Երևանի ամենահին եկեղեցիներից է։ Այն գտնվում է մայրաքաղաքի «ամենասրտում»` Աբովյան փողոցի և Սայաթ–Նովա պողոտայի խաչմերուկում։–0–