Երևան այցելած ռուս պատգամավորներն ուզում են հանդիպել Նիկոլ Փաշինյանի հետ
ԵՐԵՎԱՆ, 27 ապրիլի. /Նովոստի Արմենիա/. ՌԴ Պետդումայի պատգամավորները պատրաստ են հանդիպել Հայաստանի ընդդիմադիր շարժման առաջնորդ Նիկոլ Փաշինյանի հետ, Ինտերֆաքսի հետ զրույցում հայտարարել է Պետդումայի ԱՊՀ հարցերի, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը:
«Խնդրում ենք կազմակերպել հանդիպում «Ելք» խմբակցության կամ խմբակցության ղեկավարության հետ, ինչպես նաև այլ խմբակցությունների հետ: Եթե Նիկոլ Փաշինյանը պատրաստ է հանդիպել, մենք մեծ հաճույքով կհանդիպենք», - ասել է Զատուլինը:
«Ինչպես հայտնի է, Փաշինյանն այսօր Երևանում չէ, սակայն եթե նա ցանկություն ունենա, ապա մենք բոլորովին չենք պատրաստվում հրաժարվել հանդիպումից», - նշել է նա:
Պետդումայի ԱՊՀ հարցերի, եվրասիական ինտեգրման և հայրենակիցների հետ կապերի հանձնաժողովի ներկայացուցիչները, հանձնաժողովի նախագահ Լեոնիդ Կալաշնիկովի գլխավորությամբ, ուրբաթ գտնվում են Երևանում:
Զատուլինը նշել է, որ ուրբաթ ՌԴ պետդումայի պատգամավորներն ու Դաշնության խորհրդի անդամները Երևանում հանդիպել են ՀՀ խորհրդարանի նախագահ Արա Բաբլոյանի ու ՌԴ դեսպանի հետ:
«Ծանոթանում ենք իրավիճակին, քննարկում ենք հետագա անելիքները խորհրդարանական գործունեության մասով: Բնականաբար, հետաքրքրվում ենք` ինչ կարելի է սպասել», - ասել է նա:
Նախօրեին Փաշինյանը հայտնել է, որ ուրբաթ համախոհների հետ կմեկնի Գյումրի, որտեղ հանրահավաք կանցկացնի, իսկ հաջորդ օրը կլինի Վանաձորում:
Հայաստանում ապրիլի 13–ից մեկնարկած մասշտաբային բողոքի ակցիաների ֆոնին ապրիլի 23–ին ՀՀ վարչապետ Սերժ Սարգսյանը հրաժարական տվեց։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։ Ապրիլի 25-ին կայացած հանրահավաքին Նիկոլ Փաշինյանն առաջադրվել է որպես վարչապետի թեկնածու: Վարչապետի ընտրությունները կկայանան մայիսի 1-ին Ազգային ժողովում:–0–
