Ոսկեհատի բնակիչը ձիեր է գողացել, մորթել ու միսն իրացրել երևանյան շուկաներում (ՏԵՍԱՆՅՈւԹ)

ԵՐԵՎԱՆ, 3 փետրվարի. /Նովոստի–Արմենիա/. Ոսկեհատ գյուղի բնակիչը Աղձ գյուղի արոտավայրերից գողացել է 5 ձի, մորթել և միսը վաճառել Երևանում։

Ինչպես հաղորդում է ՀՀ ոստիկանության մամուլի ծառայությունը, հունվարի 21-ին ոստիկանության Աշտարակի բաժին դիմած գյուղացին պատմել է, որ Ոսկեհատ գյուղի տարածքում պարկի մեջ գտել է իր կորած ձիերի մնացորդները և վստահ է, որ դրանք գողացել ու մորթել են:

Նա նշել է, որ անասնակերը վերջացել էր, ձմեռով ձիերը արոտավայր էր տարել, իսկ ինքը, ցրտին չդիմանալով, տուն էր եկել, հետո հայտնաբերել, որ աշխետները կորել են։

Ոստիկաններն ուսումնասիրել են այն հատվածը, որտեղ գյուղացին գտել էր ձիերի մնացորդները:

«Հավանաբար ձիերին սայլակով էին բերել. սայլանիվի հետքերը մոտակա տներից մեկն էին տանում», – նշվում է հաղորդագրության մեջ։

Ոստիկանները նշված տան դարպասից այն կողմ գտել են սայլակը: Բակում` ծառի տակ, մորթված անասունի արյան հետքեր տեսել, գոմի մոտ` արյունով պարան:

ՀՈԲ տեսուչ Ներսիկ Խաչատրյանի խոսքով, Ոսկեհատ գյուղում կատարված որոնողական աշխատանքների և հարցումների արդյունքում պարզվել է, որ ձիերը գողացել և մորթել է նույն գյուղի բնակիչ Գաբրիել Ազիզյանը:

«Հունվարի 21-ին Գաբիել Ազիզյանին նշված գողությունը կատարելու կասկածանքով բերման է ենթարկվել ոստիկանության Աշտարակի բաժին», – նշեց Ներսիկ Խաչատրյանը։

Գաբրիել Ազիզյանն իր հերթին չի հերքել արարքն ու պատմել, թե ինչպես է այդ ամենը եղել։

«Տեսա, որ ձիերը մի քանի օր դաշտում են, մտածելով, որ տեր չունեն, մեկին բռնեցի, կապեցի, մյուս չորսը հետևից եկան: Բերեցի մեր գոմ: Մորթեցի, հետո ավտո կանչեցի, տարա Երևան, մսի պասաժում հանձնեցի», – նշել է Ազիզյանը։

Հաղորդագրության մեջ նաև նշվում է, որ Երևանի շուկաներից մեկում անծանոթ վերավաճառողին վաճառելիս Ազիզյանը չի էլ նշել, որ ձիու միս է: Իսկ թե նա ում էր վաճառելու, ինչպես էր միսն օգտագործվելու, դժվար է ասել:

Գաբրիել Ազիզյանը խոստովանական բացատրություն է տվել: Քննությունը շարունակվում է:–0–