Տարոն Մարգարյանը վստահ է իր հաղթանակում (ՏԵՍԱՆՅՈՒԹ)

ԵՐԵՎԱՆ, 14 մայիսի. /Նովոստի–Արմենիա/. Երևանի ներկա քաղաքապետ Տարոն Մարգարյանը դրական է գնահատում Ավագանու ընտրություններում ՀՀԿ–ի հաղթանակի շանսերը։

«Քվեարկել եմ «Երևանի համար»», – ասաց Մարգարյանը լրագրողներին Ավանի թիվ 1/19 ընտրատեղամասում քվեարկությունից հետո։

Մեկնաբանելով «Ելք» դաշինքի տարածած նյութերը, որոնք վկայում են իբր ՀՀԿ–ի կողմից ընտրակաշառքներ բաժանելուն` Մարգարյանը նշեց, որ իրավախախտումների դեպքում դաշինքը կարող է դիմել իրավապահ մարմիններին։

Նրա խոսքով, այդ նյութերը որևէ կապ չունեն իր ընտրական շտաբի հետ։ «Մենք կոչ ենք արել մեր մրցակիցներին իրականացնել նոր արշավ` չփորձելով արատավորել միմյանց։ Դուք ինքներդ տեսել եք, թե ինչպես է ՀՀԿ–ն իրականացրել իր քարոզարշավը», – ընդգծեց Մարգարյանը։



Քվեարկությունը կտևի մինչև երեկոյան 20:00: Երևանի ավագանու ընտրություններին մասնակցում են Հայաստանի հանրապետական կուսակցությունը, «Ելք» ընդդիմադիր դաշինքը և «Երկիր ծիրանի» ընդդիմադիր կուսակցությունը:

Ավագանու ընտրություններում ՀՀԿ–ի համամասնական ցուցակը գլխավորում է Երևանի գործող քաղաքապետ Տարոն Մարգարյանը։ «Ելք» դաշինքի ցուցակը գլխավորում է ԱԺ պատգամավոր Նիկոլ Փաշինյանը, իսկ «Երկիր Ծիրանին»` նրա հիմնադիր Զարուհի Փոստանջյանը։

«Երևան քաղաքի տեղական ինքնակառավարման մասին» օրենքի համաձայն, Երևանի քաղաքապետին ընտրում է Ավագանու խորհուրդը, որը ձևավորվում է կուսակցական սկզբունքով` համաքաղաքային ընտրությունների հիման վրա, որոնք անցկացվում են քվեարկության համամասնական համակարգով։

Ըստ օրենսդրության, եթե ընտրությունների արդյունքում խորհրդում կուսակցություններից մեկը ստանում է 50%–ից ավել տեղեր, ապա այդ կուսակցության ցուցակը գլխավորող թեկնածուն համարվում է ընտրված քաղաքապետ։ Եթե թեկնածուն չի համապատասխանում քաղաքապետին առաջադրվող պահանջներին, հրաժարվում է քաղաքապետի պաշտոնից կամ կուսակցություններից ոչ մեկը չի ստանում 50%–ից ավել, ապա քաղաքապետն ընտրվում է Ավագանու խորհրդի անդամների գաղտնի քվեարկության միջոցով։ Երևանի Ավագանու խորհուրդն ընտրվում է չորս տարի ժամկետով և բաղկացած է 65 անդամից։

Ներկա խորհրդում ներառված է երեք խմբակցություն` ՀՀԿ–ն, ԲՀԿ–ն և «Բարև, Երևան» ընդդիմադիր խմբակցությունը։ Երևանի գործող քաղաքապետ Տարոն Մարգարյանը զբաղեցնում է իր պաշտոնը 2011 թ.–ից։ –0–