ԵՐԵՎԱՆ, 17 նոյեմբերի. /Նովոստի Արմենիա/. «Զինվորական ծառայության և զինծառայողի կարգավիճակի մասին» օրենքը հետ չի կանչվի, ուրբաթ լրագրողների հետ զրույցում ասաց Ազգային Ժողովի փոխնախագահ Էդուարդ Շարմազանովը։
Загружается новость ... "Лево"
ՀՀ ԱԺ պատգամավորները չորեքշաբթի երկրորդ և վերջնական ընթերցմամբ ընդունեցին «Զինվորական ծառայության և զինծառայողի կարգավիճակի մասին» աղմկահարույց օրենքը։ Նոր օրինագծով առաջարկվում է պարտադիր զինվորական ծառայության զորակոչից ուսումնառության նպատակով տարկետում տրամադրել միայն այն դեպքում, եթե Հայաստանում հավատարմագրված բարձրագույն ուսումնական հաստատություններում բակալավրի, կամ դիպլոմավորված մասնագետի, կամ ինտեգրված կրթական ծրագրով սովորող քաղաքացին պաշտպանության նախարարության հետ կնքում է քաղաքացիաիրավական բնույթի պայմանագիր՝ ուսումնառության ընթացքում ռազմական պատրաստություն անցնելու և ուսումնառության ավարտից հետո պաշտպանության նախարարության կողմից նշված վայրում և պայմաններում զինվորական ծառայություն անցնելու մասին, սակայն այս պարագայում այդ ուսանողները 2-ի փոխարեն կծառայեն 3 տարի ժամկետով։
Նախորրդ շաբաթվանից ուսանողները բողոքի ակցիաներ և դասադուլ էին կազմակերպել օրինագծի ընդունման դեմ։ «Հանուն գիտության զարգացման» նախաձեռնության անդամները դուրս էին գալիս բողոքի ակցիաների և բոյկոտում էին դասերը։ Ի վերջո, ուսանողների և պատգամավորների միջև համաձայնություն է ձեռք բերվել նոյեմբերի 22–ին կլոր սեղան–քննարկում անցկացնել։
«Մենք պատրաստ ենք խորհրդարանական լսումներ անցկացնել բուհական և կրթական հարցերի շուրջ ԱԺ նիստերի դահլիճում։ Ուսանողների հետ մեր պայմանավորվածությունը, այդ թվում` տարկետման իրավունքի շուրջ ուժի մեջ է մնում։ Քննարկումներին կհրավիրվեն բոլոր շահագրգիռ կողմերը։ Սակայն օրինագիծը հետ չի կանչվի», – ասաց Շարմազանովը։
Նա նշեց, որ լսումները հիմք կծառայեն կլոր սեղան–քննարկումներ անցկացնելու համար` հավելելով, որ խորհրդարանը պատրաստ է շարունակել և օժանդակել այդ կարգի միջոցառումների կազմակերպմանը և ապահովել ինչպես պատգամավորների, այնպես էլ կառավարության ներկայացուցիչների մասնակցությունը։
Ինչպես նշեց փոխնախագահը, անհնար է լուծել բոլոր խնդիրները մեկ օրում, ինչի կապակցությամբ հետագայում օրենքի հիման վրա կընդունվի ավելի քան 70 ենթաօրինական ակտեր և կառավարական որոշումներ, որոնց քննարկմանը կարող են մասնակցել ուսանողները։
«Ուսանողների համար կարևոր էր իրենց ձայնը լսելի դարձնել, և մենք նրանց հարթակ ենք տրամադրում, որպեսզի բոլոր կողմերը ներկայացնեն իրենց դիրքորոշումը», – ասեց Շարմազանովը։
Նրա խոսքով, նախատեսվում է, որ բոլոր լսումները կհեռարձակվեն
առցանց։ –0–
