Սուրենյանը հերքել է «Նաիրիտի» հրդեհի պատճառով Թուրքիայի տարածք շարժվող ծուխի մասին հայտարարությունները

ԵՐԵՎԱՆ, 30 օգոստոսի. /Նովոստի–Արմենիա/. ՀՀ ԱԻՆ Հիդրոմետ ծառայության պետ Գագիկ Սուրենյանը հերքել է հայտարարություններն այն մասին, թե «Նաիրիտի» հրդեհի ծուխը շարժվել է դեպի Թուրքիա։

Երկու օր առաջ ՀՀ առողջապահության նախարարությունը հաղորդագրություն տարածեց` նշելով, որ «ՀՀ ԱԻՆ Հիդրոմետ ծառայության օդերևութաբանության կենտրոնի տվյալներով` ժամը 17-ից հետո սպասվում է քամի հյուսիս-արևելքից դեպի հարավ-արևմուտք, ինչը նշանակում է, որ ծուխն Արարատյան դաշտավայրով կգնա դեպի Թուրքիայի տարածք»։

Երևանի «Նաիրիտ» քիմիական գործարանում հնչած պայթյունի և բռնկված հրդեհի մասին ահազանգը ստացվել էր օգոստոսի 28–ին ժամը 13։00–ի սահմաններում։ Բռնկվել էին լաքէթինոլ նյութով չորս տարաներ։ Հրդեհի մարման աշխատանքներին մասնակցում էին մեծ թվով հրշեջներ և հատուկ տեխնիկա։ Օգոստոսի 30–ի դրությամբ չորս տարաներում բռնկված հրդեհը մարվել է։ Սակայն տարաներից դեռևս արձակվում է բարձր ջերմություն: Ստեղծվել է ավտոմատ համակարգ՝ մշտական հովացում ապահովելու համար:–0–