«Սուպեր Դավիթ». էլեկտրոնային նոր ուսուցողական խաղ երեխաների համար
ԵՐԵՎԱՆ, 10 հոկտեմբերի. /Նովոստի–Արմենիա/. Այսօր` հոկտեմբերի 10-ին, ՀՀ ԱԻ նախարարությունում տեղի ունեցավ «Սուպեր Դավիթ» էլեկտրոնային կրթական նոր խաղի շնորհանդեսը։
Այն ստեղծվել է ՀՀ ԱԻ նախարարության, ՀՀ ԱԻՆ Ճգնաժամային կառավարման պետական ակադեմիայի, Համաշխարհային բանկի, և Dasaran կրթական ծրագրի միջև համագործակցության արդյունքում: Ծրագրի իրականացումը հնարավոր է դարձել Ճապոնիայի և Համաշխարհային բանկի «Զարգացող երկրներում աղետների ռիսկի կառավարման ուղղորդման ծրագրի» (Աղետների նվազեցման և վերականգնման գլոբալ կառույցի (GFDRR)) աջակցության շնորհիվ, հաղորդում է ՀՀ ԱԻՆ մամուլի ծառայությունը։
Ողջույնի խոսքում ՀՀ ԱԻ նախարար Դ.Տոնոյանը շնորհակալություն հայտնեց խաղի ստեղծմանն աջակցող բոլոր գործընկերներին, ում շնորհիվ հնարավոր դարձավ անվտանգության մշակույթի ձևավորմանն ուղղված այս նախաձեռնությունը.
«Խորհրդանշական է, որ խաղի շնորհանդեսը կայացավ Աղետների ռիսկի նվազեցման միջազգային օրվա նախօրեին: Այն մշակվել է բովանդակային հստակ ուղղվածությամբ ու հասցեականությամբ: Սիրելի երեխաներ, վստահ եմ, որ այս խաղի օգնությամբ ձեռք բերված գիտելիքները կնպաստեն ձեր և ձեր շրջապատի անվտանգության ապահովմանը, որովհետև խաղի արդյունքում դուք ստանալու եք ոչ միայն միավորներ ու մրցանակներ, այլև՝ անվտանգ ապրելու երաշխիք», – նշել է նախարարը։
Dasaran կրթական ծրագրի հիմնադիր նախագահ Սուրեն Ալոյանն իր հերթին ընդգծել է, որ խաղի փորձարկման ժամանակ լուրջ արդյունքներ են գրանցվել: Ընդամենը 12 օրվա ընթացքում «Սուպեր Դավիթ» խաղը խաղացել են 187186 անգամ, որը Dasaran.am կայքի համար աննախադեպ մեծ թիվ է:
Խաղի գլխավոր հերոսի նախատիպը հայկական սիրված էպոսի հերոսն է՝ Սասունցի Դավիթը, որը բոլորին հասնում է օգնության: Dasaran կրթական հարթակում տեղ գտած նոր «Սուպեր Դավիթ» էլեկտրոնային խաղը նպատակ ունի խաղի միջոցով ուսուցման մեթոդով նպաստել հանրակրթական դպրոցներում սովորող աշակերտների (և ոչ միայն) շրջանում անվտանգության մշակույթի ձևավորմանը, հաղորդել գիտելիքներ բնական ու տեխնածին արտակարգ իրավիճակների դեպքում անվտանգության ապահովման և վարքականոնների վերաբերյալ, ինչպես նաև խրախուսել իրազեկ և դժվար իրավիճակում օգնության հասնող երեխաներին: Նշվում է նաև, որ «Սուպեր Դավիթ» խաղի միջոցով առավելագույն միավորներ հավաքած և հաղթող ճանաչված աշակերտները կստանան արժեքավոր մրցանակներ:–0–
