Սեյրան Օհանյանին կարող են որպես կասկածյալ ներգրավել ռեզոնանսային քրեական գործին

ԵՐԵՎԱՆ, 28 մարտի. /Նովոստի-Արմենիա/. Իշխանությունները իրավապահ համակարգի հետ քննարկել են Օհանյան-Րաֆֆի-Օսկանյան դաշինքից նաև պաշտպանության նախկին նախարար Սեյրան Օհանյանին ինչ-որ գործով որպես կասկածյալ կամ մեղադրյալ ներգրավելու հարցը, գրում է «Հայկական ժամանակ» թերթը:

«Օհանյանի անունը, հայտնի է, որ շրջանառվում է Նորքի զինված խմբի գործունեության շրջանակում: Բայց, մեզ հասած տեղեկությունների համաձայն, Օհանյանի ներգրավումը պայմանավորված կլինի նրա վարքագծով. եթե նա նույնպես Սամվել Բաբայանի նման կոշտ հայտարարություններ ու դիրքորոշում որդեգրի, ապա նրա ներգրավումն անխուսափելի կլինի», - գրում է պարբերականը:

Սեյրան Օհանյանին անձամբ որևէ գործում ներգրավելուն խոչընդոտում է ևս մի հանգամանք՝ նա գրանցված պատգամավորի թեկնածու է և ունի որոշակի անձեռնմխելիություն: «Եվ եթե նրան հանցագործություն կատարելու պահին չեն բռնել, ապա, պարզապես կասկածելով, միանգամից չեն կարող ձերբակալել, ինչպես դա արեցին Բաբայանի դեպքում», - նշում է թերթը:

Ընտրական օրենսդրության համաձայն՝ գրանցված թեկնածուի դեպքում քրեական հետապնդում կարող է հարուցվել միայն ԿԸՀ-ի համաձայնությամբ: «Առանց դրա նա չի կարող զրկվել ազատությունից: Իսկ ԿԸՀ-ն նշված հարցի վերաբերյալ որոշում ընդունում է հանձնաժողովի անդամների ընդհանուր թվի ձայների առնվազն 2/3-ով», - նշվում է գրառման մեջ: -0-