Սարգսյան. Հայաստանը կշարունակի խաղաղապահությունը Աֆղանստանում
ԵՐԵՎԱՆ, 9 հուլիսի. /Նովոստի-Արմենիա/. Հայաստանը մտադիր է շարունակել խաղապահությունը Աֆղանստանում 2016 թ.-ից հետո, հայտարարել է շաբաթ Վարշավայում ՀՀ նախագահ Սերժ Սարգսյանը:
«Մենք պատրաստակամություն ենք հայտնել մասնակցելու ՆԱՏՕ-ի «Տևական գործընկերություն» առաքելությանը, երբ այն փոխարինի «Հաստատակամ աջակցություն» առաքելությանը: Այդ նպատակով Հայաստանը ներգրավված է Աֆղանստանում ՆԱՏՕ-ի քաղաքացիական ժամանակավոր ներկայության պլանավորման գործընթացին», - ասել է Սարգսյանը Վարշավայում՝ «Հաստատակամ աջակցություն» առաքելության հանդիպմանը:
Այս կապակցությամբ նա հատուկ ընդգծել է Գերմանիայի հետ Հայաստանի արդյունավետ համագործակցությունը, որն իր կարծիքով ՆԱՏՕ-ի անդամ և գործընկեր երկրների փոխգործակցության լավագույն և ուսանելի օրինակներից է:
Նախագահը նշել է, որ բոլոր ներկաներին այսօր միավորում է բարեկամ աֆղան ժողովրդի համար խաղաղություն, անվտանգություն և կայունություն ապահովելու անհրաժեշտության գաղափարը:
«Հայաստանը, որպես համագործակցային անվտանգության ջատագով, հաստատակամ է իր համեստ ներդրումը բերելու միջազգային խաղաղության և անվտանգության ամրապնդման ջանքերին: 2015 թվականի սեպտեմբերին Նյու Յորքում կայացած Խաղաղապահության գագաթնաժողովի ժամանակ Հայաստանը լրացուցիչ հանձնառություններ ստանձնեց՝ նախապատրաստել երկրորդ աստիճանի դաշտային հոսպիտալ և ապահովել ինքնաշեն պայթուցիկ սարքերի վնասազերծման հատուկ վաշտի պատրաստականությունը», - հիշեցրել է Սարգսյանը:
Նախագահ Սերժ Սարգսյանն այսօր Լեհաստանի Հանրապետության մայրաքաղաքում մասնակցել է Աֆղանստանում «Հաստատակամ աջակցություն» առաքելության՝ ՆԱՏՕ-ի անդամ և ոչ անդամ պետությունների և կառավարությունների ղեկավարների ձևաչափով հանդիպմանը, որն անցկացվում է Հյուսիսատլանտյան դաշինքի գագաթնաժողովի շրջանակներում: ՀՀ Նախագահը հանդես է եկել ելույթով.
Լեհաստանի Հանրապետության մայրաքաղաքում կայացած Հյուսիսատլանտյան դաշինքի գագաթնաժողովին մասնակցում են ՆԱՏՕ-ի անդամ և ոչ անդամ պետությունների և կառավարությունների ղեկավարները:
Աֆղանստանում հայկական զորախումբը՝ 56 հայ խաղաղապահներեով, իր առաքելությունն է իրականացնում Միջազգային անվտանգության աջակցման ուժերի կազմում: Հայաստանը մասնակցում է խաղաղապահ առաքելություններին Կոսովոյում, Մալիում և Լիբանանում (ՄԱԿ-ի հովանու ներքո): - 0-
