«Ռոստելեկոմը» Հայաստանում հանդես է եկել պարզաբանմամբ` կապված «Պանարմենիան մեդիա գրուպի» հայտարարության հետ

ԵՐԵՎԱՆ, 2 նոյեմբերի. /Նովոստի–Արմենիա/. «Ռոստելեկոմ» հեռահաղորդակցական օպերատորը Հայաստանում հանդես է եկել պարզաբանմամբ` կապված «Պանարմենիան Մեդիա Գրուպ» ՓԲԸ-ի հայտարարության հետ:

«Պանարմենիան Մեդիա Գրուպ» ՓԲԸ-ն չորեքշաբթի հայտարարություն է տարածել, որում նշվում է, որ նա լայնամասշտաբ բանակցային գործընթաց է սկսում կաբելային հեռուստահեռարձակման օպերատորների հետ` «Արմենիա», «ATV» և «ArmNews» հեռուստաալիքների հեռարձակման ապահովման համար, որը մինչ այդ իրականացվում էր «Հիբրիդ Սոլյուշնզ» ՍՊԸ-ի կողմից: Ընկերությունը կոչ է արել օպերատորներին կամ դադարեցնել հեռուստաալիքների հեռարձակումը կամ համաձայնեցնել «Պանարմենիան Մեդիա Գրուպ» ՓԲԸ-ի հետ միասին վերաթողարկման պայմանները:

Ինչպս նշեցին «Ռոստելեկոմից», «Ռոստելեկոմ» հայաստանյան ցանցի միջոցով հեռուստաալիքների հեռարձակումն իրականացվում է գործընկեր հեռարձակող «Հիբրիդ Սոլյուշնզ» ՍՊ ընկերության միջոցով։

«Հայկական հեռուստաալիքները մշտապես ներառված են եղել և շարունակելու են ներառված մնալ «Ռոստելեկոմի» բոլոր փաթեթներում` անվճար դրամ արժեքով», - նշել են ընկերությունից։

Ընդ որում, ինչպես նշվում է հաղորդագրության մեջ, թվով հինգ հեռուստաալիք ներառված է «Սոցիալական» կոչվող փաթեթում, որի շրջանակում հինգ հեռուստաալիքներ՝ Armenia TV, Հայաստանի հանրային (Հ1), Հայկական երկրորդ (h2), «Կենտրոն» և «Միր» հեռուստաալիքները հասանելի են բոլոր բաժանորդներին անգամ այն ժամանակ, երբ ծառայությունները պարտքի պատճառով կասեցված են։

«Նոյեմբերի 1-ից «Պանարմենիան Մեդիա Գրուպ» ՓԲԸ-ի կողմից, առանց որևէ պատճառի, դադարեցվեց հեռարձակումը նաև մեր՝ «Ռոստելեկոմի» հայաստանյան ցանցում։ Հավաստիացնում ենք, որ «ՋԻԷՆՍԻ-ԱԼՖԱ» ՓԲ («Ռոստելեկոմ» ապրանքանիշ) ընկերությունը կարևորում է ցանկացած բիզնես գործընթաց և մշտապես բանակցում է գործընկերների հետ՝ գործելով ՀՀ օրենսդրության շրջանակում», - նշել են ընկերությունից։

Ընդ որում հաղորդագրության մեջ նշվում է, որ ընկերությունը միշտ պատրաստ է մասնակցել բանակցային գործընթացներին, հատկապես, եթե դա առնչվում է ընկերության բաժանորդների շահերին և ցանկություններին։

«Ի հավելում նշենք, որ «Ռոստելեկոմն», ի շահ իր բաժանորդների, ակնկալում է հարցին տալ շուտափույթ լուծում և պատրաստ է գործադրել բոլոր ջանքերը խնդրի հանգուցալուծման համար», - նշվում է ընկերության հաղորդագրության մեջ:

«Ռոստելեկոմ» ԲԲԸ–ի հայկական դուստր ընկերությունը` «GNC-ALFA» ՓԲԸ–ն, 2012 թ.–ի դեկտեմբերից սկսել է կապի ծառայություններ մատուցել Հայաստանի տարածքում Rostelecom ապրանքանիշի ներքո։

Ընկերության օպտիկամանրաթելային ցանցը ծածկում է Հայաստանի տարածքի 80 տոկոսն` ավելի քան 2500 կմ ընդհանուր երկարությամբ։ Ցանցը միացված է հիմնական տարածաշրջանային մայրուղային ցանցերին և տրաֆիկի փոխանակման խոշոր հանգույցներին, ինչպես նաև Վրաստանի և Իրանի տարածքով անցնող միջազգային խողովակներին։ –0–